TAGBILARAN CITY, Bohol, Aug. 11 (PIA)–Gi-aghat sa Commission on Elections (Comelec) ang mga adunay kakulian sa panglawas o persons with disabilities (PWD) nga pahimoslan ang special registration karong adlawa, Agosto 11.
Sa usa ka information sharing atol sa tigum sa mga miyembro sa Association of United Development Information Officers in Bohol (AUDIO-Bohol) sa niaging adlaw, miingon ang tigpamaba sa lokal nga buhatan sa COMELEC dinhi nga si Juvenal Beniga nga hatagan og prayoridad karong adlawa ang mga PWDs nga makaparehistro gikan sa alas 8 sa buntag hangtud alas 5 sa hapon.
Gibutyag ni Beniga nga adunay resolusyon nga libre ang pamasahe sa mga PWDs nga magparehistro karong adlawa nga abagahon sa mga local government units (LGUs).
Giingong kinahanglan lang sa mga PWDs nga magdala og valid ID.
Gipahibalo usab ni Beniga nga nagsugod na usab ang detainee registration kun pagparehistro sa mga binilanggo nga 18 anyos pataas ug nakadetena sulod sa mga detension centers nga dili mo-ubos sa unom ka buwan sa dili pa mag-eleksyon. (PIA-Bohol/ecb)
Recruitment pagka-pulis, gibuksan
TAGBILARAN CITY, Bohol, Aug. 11 (PIA)–Gipahibalo sa Philippine National Police (PNP)
ang pagpangdawat nila karon og aplikasyon alang sa Police Officer 1.
Sa usa ka information sharing atol sa tigum sa mga miyembro sa Association of United Development Information Officers in Bohol (AUDIO-Bohol) niadtong Huwebes, gibutyag ni SPO1 Jennifer Atanacio nga kadtong mga interesadong mo apply, mahimong mo log-on lang sa ilang Facebook page nga RSS,PRO7 alang sa mga requirements.
Gikinahanglang naa sa 30 anyos paubos ug gradwado sa 4-year course ang usa ka alpikante.
Apan kun wala nakahuman og kurso ang interesadong aplikante, kinahanglan mokuha kini og pasulit sa National Police Commission (NAPOLCOM).
Sa Agosto 15 gitakda ang screening sa mga aplikante.
Gipahibalo usab ni Atanacio nga nagsugod na sila niadtong Miyerkoles sa pagpamilit og mga ‘Be safe be secured’ stickers sa mga pampublikong sakyanan dinhi sa syudad sa Tagbilaran.
Nakabutang dinhi ang mga hotline numbers sa Bohol Provincial Police Office.
Gi-require na usab kining maong mga stickers sa tanang mga lungsod nga ibutang dinhi ang mga hotline numbers sa ilang police station ug sa provincial headquarter. (PIA-Bohol/ecb)
