Rapid response team sa DoH, gimugna batok sa Ebola
MANILA, Nov. 03 (PIA)–Gimugna na ang grupo sa mga doktor ug health workers nga Rapid
Response Team nga naghulat na aron i-deploy sa mga lagyong mga lugar sa nasud kun makasulod man ang Ebola virus.
Matud pa sa tigpamaba sa Department of Health (DOH) nga si Dr. Lyndon Lee Suy, ang mga miyembro sa rapid response team nipaubos sa pagbansay aron pugngan ang pagkatap sa maong sakit.
Ang 122 ka doktor nga gipaubos sa special training mao usab ang mo-giya sa uban pang health workers sa mga lagyong lugar aron pugngan ang posibleng pagkatap sa Ebola.
Adunay tulo ka rapid response team nga gilangkoban sa duha ka doktor, medical technologist ug nurse nga andam nang ipadala sa mga lalawigang posibleng adunay kaso sa Ebola.
Gipasabot ni Suy nga nimugna ang gobyerno og rapid response team aron malimitahan ang lihok sa posibleng pasyenteng may Ebola sa nasud.
Matud pa usab ni Dr. Julie Hall, World Health Organization (WHO) country representative, ang mga team kinahanglan pa gihapon ipaubos sa comprehensive training.
Sa labing ulahing taho sa DOH, nagpabiling Ebola free ang nasud human nag-negatibo sa nahisgotang sakit ang 126 Filipino workers nga mibalik sa nasud gikan sa mga nasud nga apektado sa makamatay nga sakit. (ecb/PIA7-Bohol)
