MANILA, July 4 (PIA)–Buksan karong bulana sa Comission on Elections (Comelec) ang rehistrasyon aron makabotar sa nagsingabot nga barangay ug Sangguniang Kabataan (SK) election karong tuig.
Matud pa ni Comelec Commissioner Luie Guia, sa Hulyo 15 hangtud 31 mahimong magparehistro ang mga buot mobotar sa eleksyon sa Oktubre ning tuig.
Kini matud pa ni Guia aron mahimong andam tulo ka buwan sa dili pa ang piniliay sa umaabot nga Oktubre.
Giingong dili na usab i-uswag ang rehistrasyon tungod kay apiki na ang Comelec sa oras.
Gihatagan usab og 15 ka adlaw nga mopasang-at og bisan unsang protesta ang gustong mobabag sa gitakdang registration.
Niadtong 2013 election, gipahigayon ang rehistrasyon gikan Hulyo 22 hangtud 31 diin kapin sa duha ka milyong indibidwal ang naka-parehistro aron mobotar sa Barangay election samtang adunay 3.1 milyiong kabataan ang nagpa-rehistro aron makabotar sa SK election. (ecb/PIA7-Bohol)
