TAGBILARAN CITY, Bohol, July 03 (PIA)–Nia na sa Pilipinas ang reyna sa nasud sa Espanya nga si Her Majesty Queen Sofia alang sa lima ka adlaw nga pagbisita sa nasud.
Matud pa sa Department of Foreign Affairs, apil sa mga aktibidad sa reyna ang personal nga pagsusi sa mga development projects nga gipondohan sa Spanish government.
Sakay sa Emirates Airline flight gikan sa Europe, gihatagan og royal welcome sa Ninoy Aquino International Airport si Queen Sofia ni Spanish Ambassador to the Philippines Jorge Domecq ug DFA Sec. Albert Del Rosario.
Gikumpirmar usab ni Sec. Del Rosario nga adunay private audience ang reyna ni Presidente Benigno Aquino III sa Malacañang.
Karong 7:30 sa gabii, adunay dinner ang reyna sa Spanish Ambassador residence sa Forbes Park, Makati City ug ugma sayo sa buntag, sayo kining molibot ug motambong og meeting sa nagkalain-laing NGOs.
Mga 6:30 sa gabii ugma, moadto kini sa Palasyo sa Malacañang ug alas-7:00 sa gabii ang iyang pakig-dinner ni Presidente Aquino.
Sa Miyerkoles, moadto kini sa Albay aron bisitahon ang mga proyektong gipondohan sa Espanya ug sa Climate Change Academy.
Sa Huwebes, moadto na usab kini sa Zamboanga City ug mobalik sa Manila sa Biyernes alang sa usa ka event sa University of Santo Tomas (UST). (PIA-Bohol/ecb)
Indonesian monitoring team, nia na sa Pinas
TAGBILARAN CITY, Bohol, July 03 (PIA)– Nia na sa nasud ang mga gitudlong monitoring team sa Indonesian government aron tutukan ang giduso nga panaghisgot sa kalinaw tali sa gobyerno ug Moro Islamic Liberation Front (MILF) sa Mindanao.
Niabot kagahapon ang Indonesian team nga gilangkoban sa 10 ka opisyal sa militar ug lima ka sibilyan.
Una nang gipahayag ni Indonesian Foreign Minister Natalegawa nga obligasyon na sa ilang nasud nga i-promote ug palig-onon ang relasyon sa Indonesia ug Pilipinas.
Kini ang ikaduhang higayon nga nagpadala sa ilang monitoring contingent ang Indonesia sa nasud.
Ang maong grupo ang moapil sa foreign contingent nga mokuyog sa peace monitoring mission.
Apil nila ang mga tinugyanan gikan sa Malaysia, Brunei, Japan, Libya ug European Union. (PIA-Bohol/ecb)
Hangtud P6-M na ang mahimong hulamon sa Pag-ibig Fund
TAGBILARAN CITY, Bohol, July 03 (PIA)–Gisaka na sa P6 milyon ang maximum loanable amount o kantidad nga mahimong ma-utang sa mga miyembro sa Home Development Mutual Fund (HDMF) o Pag-IBIG Fund gikan sa kasamtangang P3 milyon.
Matud pa ni Pag-IBIG Fund President Darlene Marie Berberabe, gi-aprubahan sa board niadtong Hunyo 22 ang maong lakang ug gipatuman kini sukad kagahapon, Hulyo 2.
Himuon na usab nga market-based ang pagpatong og interes gikan sa fixed rate nga 11.5-percent matag tuig.
Kini nagpasabot nga kun unsa ang kasamtangang interest rate sa mga bangko, mao na usab ang ipatong nilang interes.
Papilion usab ang mga miyembro kun gusto niini ang tulo ka tuig, lima o 10 ka tuig nga pagpahamtang sa repricing sa interes sa ilang utang.
Gilusad usab sa Pag-IBIG ang multi-purpose loan diin mahimong mohulam og gamay nga kantidad nga gusto sa mga miyembro sa ubang galastohan sama sa pagbakasyon. (PIA-Bohol/ecb)
3 ka grabeng sakit, sakop na sa PhilHealth
TAGBILARAN CITY, Bohol, July 03 (PIA)–Sakop na usab sa bag-ong benepisyo sa Philippine Health Insurance Corporation (PhilHealth) ang pipila sa gitawag nga ‘catastrophic illness’ sama sa early stage breast cancer, prostate cancer ug childhood acute leukemia.
Matud pa ni Health Secretary Enrique Ona, chairman sa PhilHealth board, gilusad kagahapon sa PhilHealth ang bag-ong Case type-Z benefit package nga maghatag og substantial financial risk protection ug pagpatambal sa mga catastrophic illnesses.
Ubos sa maong benefit package, magbayad ang PhilHealth og tig-P100,000 alang sa breast cancer ug prostate cancer ug P210,000 usab alang sa standard acute lymphoblastic leukemia.
Apil sa package ang bayad sa hospital services sama sa hospital room ug board fees, mga medesina ug laboratory exams, operating room ug professional fees alang sa kinatibuk-ang panahon sa pagpatambal, apil na ang mandatory ug uban pang serbisyo nga required per illness.
Miingon si Ona nga ang pinakamahinungdanon nga benepisyo mao nga dili na kinahanglan pang magbayad ang mga kabus nga maapil sa i-enroll sa local government unit sa maong sponsored program sa PhilHealth. (PIA-Bohol/ecb)
