TAGBILARAN CITY, Bohol, Jan. 03 (PIA)–Andam ang Malakanyang nga idepensa ang paglagda ni Presidente Benigno “Noynoy” Aquino III sa kontrobersyal nga Responsible Parenthood and Reproductive Health (RH) Act of 2012.
Kini ang tubag sa Palasyo human niduso og petisyon sa Supreme Court (SC) ang magtiayon nga abogadong sila Atty. James ug Lovely Ann Imbong nga mikuwestyon sa legalidad sa maong balaod ug mihangyo nga ipahunong ang implementasyon niini.
Matud pa ni Presidential Spokesperson Edwin Lacierda, daang isyu ang gitumbok sa magtiayong Imbong sa ilang petisyon ug kaniadto pa kini natuki sa Kongreso.
Giingong pinaagi sa Office of the Solicitor General (OSG), idepensa sa Palasyo ang ilang posisyon sa maong balaod.
Ang maong balaod hilom nga gilagdaan ni Presidente Aquino niadtong Disyembre 21 human ang taas nga debate sa manag-atbang nga kapulungan sa Kongreso. (PIA-Bohol/ecb/I-gg)
Palasyo, nihimakak nga nakalapas ang gobyerno sa ceasefire tali sa NPA
TAGBILARAN CITY, Bohol, Jan. 03 (PIA)–Dismayado ang Malakanyang sa nabalita nga putlon sa New People’s Army (NPA) sa mas sayo ang nasabutang ceasire.
Dungan niini, hingpit nga gihimakak ni Presidential Spokesperson Edwin Lacierda nga may nalapas ang gobyerno sa ceasefire agreement.
Matud pa ni Lacierda, nagpabiling matinod-anon ang gobyerno sa tinguhang makamugna og kasabotan tali sa CPP-NPA-NDF.
Samtang, nag-andam na ang Philippine National Police (PNP) sa posibleng pag-atake sa mga rebelde sa tanang mga istasyon sa pulis.
Matud pa ni PNP Spokesperson P/Supt. Generoso Cerbo, Disyembre 23 pa nila gibutang sa heightened alert ang mga kapolisan sa tibuok Luzon ug Kabisay-an.
Kini human gi-atake sa mga rebelde ang usa ka presinto sa PNP sa Roxas, Palawan niadtong Disyembre diin usa ka pulis ang namatay ug usa usab ang naangol. (PIA-Bohol/ecb/I-sjp)
