TAGBILARAN CITY, Bohol, July 4 (PIA)– Pormal nang nanumpa sa katungdanan si kanhi Senador Mar Roxas isip bag-ong kalihim sa Department of Transportation andCommunications (DOTC). Mismong si Presidente Benigno “Noynoy” Aquino III ang nagpanumpa sa katungdanan ganinang buntag kang Roxas sa usa ka hamubong seremonya sa Malakanyang kauban ang uban pang mga bag-ong gibutang nga opisyal gikan sa ubang departamento.
Kauban ni Roxas sa iyang oath taking ang asawang si Korina Sanchez, inahan nga si JudyAraneta-Roxas ug anak nga si Paolo.
Sa pakighinabi sa mga tigbalita kang Roxas, miingon kini nga sa wala pa sila mideretso sa Malakanyang, niadto una sila sa lubnganan sa iyang amahan og igsuon aron sa pag-ampo.
Giseguro sa bag-ong kalihim nga makigpulong dayon siya sulod ning semanaha sa mga ahensyang ubos sa DOTC aron makisayud sa sitwasyon ug problema sa maong mga ahensya. Giingong mopahigayon usab siya og assessment kun maayo ba ang nahatag nga serbisyo-publiko sa matag ahensya ug isapinal ang mga priority projects niini aron makahimo og coherent program.
Gitataw usab sa kalihim nga personal niyang inspeksyunon ang mga bus terminal aron maimbentaryo ang mga prangkisa ug masolbad na ang problema sa colorum. (PIA-Bohol/ecb)
