MANILA, Jan. 03 (PIA)–Padayon nang gitangtang sa Department of Budget and Management (DBM) ang special allotment release order (SARO) system tungod sa nadiskubreng anomaliya.
Si DBM Sec. Butch Abad mismo ang nipahibalo niini diin iyang gibutyag nga tungod sa pagtangtang sa SARO system, ang mismong General Appropriations Act (GAA) nga gi-aprubahan sa Kongreso ang mahimong ‘official budget release document’ sa gobyerno sa mga pondo sa nagkalain-laing ahensya sa kagamhanan.
Bisan pa niini, giseguro ni Abad nga hugot ang himuon nilang pag-release sa pondo sa tinguhang dili kini maadto sa kurapsyon.
Samtang padayon ang imbestigasyon sa National Bureau of Investigation (NBI) kalabot sa pag-peke sa SARO alang sa farm to market roads nga nagkantidad og P879 milyon.
Apil sa gi-imbestigahan sa NBI ang pagkalambigit sa driver ug janitor sa DBM, pipila ka empleyado ug staff mismo sa mga congressman.
Gipaabot nga iduso sa NBI ang ilang investigation report sa ma-anomaliyang pag-peke sa SARO sa katapusan ning buwan sa Enero sa Department of Justice (DOJ). (PIA7-Bohol/ECB)
