ANG Senate blue ribbon committee magsugod na sa ilang imbestigasyon karong Martes sa mga gipasangil sa usa ka retiradong obispo nga adunay mga opisyal sa administrasyong Aquino nga nagdawat og binuwan nga suhol gikan sa mga jueteng operators.
Si Senador Teofisto Guingona III, pangulo sa blue ribbon committee, niingon nga ang maong hearing maghatag sa hapsay nga forum alang sa mga hingtungdang tawo aron pagsaysay sa ilang mga nahibaw-an bahin sa giingong jueteng payoffs.
Matud pa ni Guingona nga tumong nilang mahibaw-an ang gidak-on sa maong problema, unsaon pag sulbad niini, ug kon aduna bay kinahanglang himoong bag-ong balaod.
Si Guingona nagkanayon nga ila nang gidapit sa maong hearing si retired Lingayen-Dagupan Archbishop Oscar Cruz, kinsa maoy niingon nga adunay ubang opisyal sa kagamhanan ni Presidente Aquino ang naglihok isip jueteng operators o mga protektor sa jueteng operators.
Gidapit usab silang Interior Secretary Jesse Robredo, Interior Undersecretary Rico Puno, Philippine Charity Sweepstake Office (PCSO) Small Town Lotteries (STL) project manager Romualdo Quiñones, ug Philippine National Police (PNP) chief Deputy Director General Raul Bacalzo. (PIA)
