MANILA, January 19 (PIA)–Madawat na sa mga magtutudlo ang gipaabot nilang Special Hardship Allowance (SHA) gikan sa Department of Education (DepEd).
Kini human gi-aprubahan na ni DepEd Kalihim Leonor Briones ang pagpagawas sa pondo alang sa SHA aron pun-an ang kakulang sa mga rehiyonal nga buhatan niini niadtong 2016.
Ang maong pondo alang sa kapin 14 ka libong recipient schools nga ang mga magtutudlo nakadestino sa mga hardship posts ug multi-grade classes ug kapin sa duh aka libong school districts ug community learning center nga adunay mobile ug alternative learning system teachers.
Una nang nangayo ang DepEd og P977 milyon alang sa SHA niadtong niaging Nobyembre gikan sa Department of Budget (DBM) nga nagpagawas usab og Special Allotment Release Order alang niini niadtong Disyembre 29, 2017.
Apil sa mga makadawat sa SHA mao ang mga multigrade, mobile ug ALS teachers gikan sa Rehiyon 1, 2, 3, 4-A, 4-B, 5, 6, 7, 8, 9, 10, 11, 12, 13, Cordillera Administrative Region (CAR), ug National Capital Region (NCR). (ecb/PIA7-Bohol)
