TAGBILARAN CITY, October 21 (PIA)–Gitakdang ilusad sa kagamhanang syudad sa Tagbilaran sa Enero sunod tuig ang Enhanced Tax Revenue Assessment and Collection System (e-TRACS), usa ka software nga gamiton aron mag-computerize ug magdumala sa buhis ug kinitaan sa syudad.
Kini ang gipa-ambit sa tigpamaba sa syudad sa Tagbilaran nga si Fiel Angeli Araoarao Gabin atol sa information sharing sa gipahigayong panagtapok sa mga miyembro sa Association of United Development Information Officers in Bohol (AUDIO-Bohol) kagahapon didto sa New Farmer’s Hall sa NIA Bohol Irrigation Project Site sa lungsod sa Pilar, ning lalawigan.
Matud pa ni Gabin, kining sistema gilaraw aron mapadali ang transaksiyon sa City Hall diin gitakdang ilusad kini sa Enero 2017, nga panahon sa pag-renew og business ug mayor’s permits.
Kalabot niini, may gipahigayon ang syudad nga upat ka adlaw nga pagbansay-bansay sa mga kawani sa City Hall alang niining bag-ong sistema.
Ang maong pagbansay-bansay gipangunahan ni Linda Paredes, Coordinator sa USAID-SURGE (United States Agency for International Development Aid-Strengthening Urban Resilience for Growth with Equity) project.
Matud pa nga kun mapahimotang na kining bag-ong sistema, ang kanhi 14 ka lakang nga proseso nga naglakip sa pagsumiter sa personal documents sa pagkuha og business permits, mahimo na lang nga 3 ka lakang nga proseso.
Kahinumdoman nga si Tagbilaran City Mayor John Geesnell Yap milagda sa Executive Order No. 19 niadtong Setyembre 1 nga nagmugna sa Interim Information and Communication Technology Office (ICT) sa syudad.
Isip ICT arm sa syudad, ang Tagbilaran Information and Communication Technology Office (TICTO) gitahasan sa pagpanguna sa computerization sa nagkalain-laing strategic operations sa syudad kalabot sa revenue generation, fiscal management, supply and property management, development planning and personnel ug records management. (ecb/PIA7-Bohol)
