TAGBILARAN CITY, Bohol, July 05 (PIA)–Gitumbok karon sa Malacañang nga ang ‘BB+’ rating sa Standard & Poor’s (S&P) sa Pilipinas nagpamatuod lamang nga epektibo ang fiscal management sa Aquino administration.
Sa maong credit upgrade, usa ka lakang na lang ang Pilipinas gikan sa investment grade status nga dugay nang gitinguha sa gobyerno aron mas modaghan pa ang mga mamuhunan sa nasud.
Matud pa ni Presidential Communications Sec. Ricky Carandang, samtang aduna pay debate karon tali sa pagdaginot batok sa paggahin og stimulus, napamatud-an sa Pilipinas nga kaya niining mogasto nga dili kinahanglang mohinay ang atong fiscal position.
Dugang pa ni Carandang, gipaningkamotan kini sa Presidente kauban ang economic team aron ma-upgrade ang credit status sa nasud.
“The President and the economic team have worked hard to win ratings upgrades and we’re another step closer to investment grade status,” matud pa ni Carandang.
Gikan sa ‘BB+,’ usa ka lakang na lamang ang Pilipinas sa ”BBB-‘ credit rating, ang pinaka-ubos nga investment grade matud pa sa mga market participants.
Sunod niini ang ‘BBB’, ‘A,’ ‘AA,’ ug ang labing gitinguha nga ‘AAA.’
Apil sa mga nasud nga may ‘AAA’ credit rating (as of January 2012) ang UK, Australia, Canada, Denmark, Finland, Germany, Hong Kong, Liechtenstein, Luxembourg, Netherlands, Norway, Singapore, Sweden ug Switzerland.
Ang ‘AAA’ maoy pinakataas nga rating nga nagpasabot nga ang nasud nga aduna niini wala’y problema sa pagbayad sa utang. (‘AAA’ – Extremely strong capacity to meet financial commitments, Highest Rating). (PIA-Bohol/ecb)
BSP nimandu sa pagbutang sa mga detalye sa utang ug interes sa mga konsyumer
TAGBILARAN CITY, Bohol, July 05 (PIA)–Nipagawas og direktiba ang Bangko Sentral sa Pilipinas (BSP) sa tanang lending institutions nga ihikyad sa ilang mga konsyumer ang detalye sa utang ug interes.
Matud pa sa BSP, kauban niini ang total cost sa loan, apil na ang tanang interes, fees, service charge, discounts ug mga gipatong nga galastohan nga adunay kalabotan sa utang.
Angay usab nilang ipatong ang interes sa outstanding balance ug dili sa principal amount o kinatibuk-ang kantidad sa gi-utang.
Pasabot pa ni BSP Deputy Governor Nestor Espenilla, “‘Yung focus kasi lagi ng uutang is on the money, just sign on the dotted line, then he will realize later na its quite expensive pala.”
Sakop niining direktiba ang mga bangko, credit card, lending companies, pawnshop ug bisan ang mga ahensya sa gobyerno nga nagpautang. (PIA-Bohol/ecb)
