TAGBILARAN CITY, Bohol, Jan. 14 (PIA)–Gi-aghat sa Philippine National Police (PNP) ang publiko nga magbinantayon ug isumbong dayon ang mga kadudahang checkpoint sa awtoridad.
Atubangan kini sa pagsugod sa election period kagahapon ug pagpatuman na usab sa election gun ban sa tibuok nasud.
Kahinumdoman nga usa sa mga gihikyad sa PNP ang pagpahigayon og mga checkpoint aron masakmit ang mga loose firearm ug madakpan ang mga molapas sa gun ban.
Apan matud pa sa PNP, dili angay kahadlokan ang mga checkpoint.
Tungod niini, gipagawas sa kapolisan ang mga sumbanan sa pagpahigayon og checkpoint nga mao ang mosunod:
Layo pa lang ang motorista, kinahanglang kabalo siya nga may checkpoint tungod kay
may signage.
Kinahanglang nakasol-ob og uniforms ang mga polis. Dili mahimo ang camouflage o combat uniform.
Kinahanglang adunay naka-park nga marked police vehicle sa checkpoint.
Kinahanglang dili sa ngitngit nga lugar naka-pwesto ang checkpoint.
Dili mahimong magpakanaug og tawo sa sakyanan o ablihan ang glove compartment o ang likod sa sakyanan.
Matud pa ni PNP spokesperson Chief Supt. Generoso Cerbo, dili awtorisado ang mga polis nga naa sa checkpoint nga mopahigayon og physical ug body search, gawas kun may timbre kini gikan sa ubang polis sama sa higayon nga adunay tulisan nga gipangita sa maong lugar.
Giingong visual check lamang ang angay ipatuman kun “walay reasonable doubt o reasonable ground.” (PIA-Bohol/ecb/I-sjp)
