TAGBILARAN CITY, Bohol, Oct. 18 (PIA)–Gikumpirmar karon ni Department of Interior and Local Government (DILG) Sec. Mar Roxas nga nabalik na sa normal ang halos tanang suplay sa koryente sa daghang lungsod sa Bohol nga grabeng naapektuhan sa magnitude 7.2 nga linog nga nitay-og sa lalawigan niadtong Oktubre 15.
Matud pa ni Roxas, tulo na lamang ka lungsod karon ang wala pa gihapo’y suplay sa kuryente nga naglangkob sa Maribojoc, Loon ug Sagbayan.
Dugang pa sa kalihim, ang police station ug munisipyo lamang sa lungsod sa Loon ang adunay suplay sa koryente karon.
Giingong gihimuan na kini og paagi sa Department of Energy (DoE) ug lokal nga electic cooperative dinhi nga mabalik na sa normal ang suplay sa koryente sa tibuok lalawigan.
Samtang gipahibalo ni Director Asteria Caberte sa Department of Trade and Industry (DTI) sa Rehiyon 7 nga susihon na sa DOE ang giingong over pricing sa pagbaligya og gasolina dinhi sa lalawigan sa Bohol nga grabeng naapektuhan sa linog.
Matud pa ni Caberte, dili apil sa price freeze ang gasolina ug wala may kakulang sa suplay dinhi sa lalawigan apan nadugay lamang ang pag-abot tungod sa mga nagubang dalan.
Una nang nipagawas og prize freeze ang DTI sa mga nag-unang panaliton sa Bohol ug Cebu apan wala naapil niini ang presyo sa gasolina.
Una niini, gireklamo sa pipila ka mga residente dinhi ang P100 matag litro nga presyo sa gasolina tungod kay nagdugang lamang kini sa kalisod sa mga motorista.
Gireklamo usab sa ubang tricycle driver dinhi ang giingong pag-limit sa pagbaligya og gasolina sa ubang gasoline station og usa ka litro lamang sa matag sakyanan nga magpagasolina. (ECB/PIA7-Bohol)
