TESDA, nipasidaan batok sa mga ilegal nga training ug recruitment centers
MANILA, Nov. 17 (PIA)–Nipasidaan ang Technical Education and Skills Development Authority (TESDA) sa mga mamumuo ug estudyante batok sa mga ilegal nga training ug recruitment center.
Gihimo ni TESDA Director General Joel Villanueva ang pasidaan human gipasirad-an sa Philippine Overseas Employment Administration (POEA) ang RRR International Training Center tungod sa giingong ilegal nga pang-recruit og mga aplikante aron maka-trabaho sa mga pabrika sa Japan ug Korea.
Matud pa ni Villanueva, wala sa ilang listahan ang RRR International Training Center nga adunay buhatan sa Plaza Cristina Building sa Dolores, San Fernando, Pampanga isip technical vocational school ug training center.
Una nang gibutyag sa POEA ang mga training center nga walay awtoridad nga mang-recruit og mga trabahante.
Gitambag usab sa TESDA sa publiko partikular na sa mga ginikanan nga susihon gayud og maayo kun tinuod bang lihitimo ang gipahigayong pagbansay-bansay sa ilang mga gihinganlang kumpanya ilabi na nga mga menor de edad ang kasagarang i-recruit niining mga pekeng technical vocational schools ug mga training centers. (ecb/PIA7-Bohol)
