TAGBILARAN CITY, Bohol, Aug. 22 (PIA)–Giseguro kagahapon ni Presidente Benigno ‘Noynoy’ Aquino III nga adunay nagpaabot nga trabaho alang sa 6,000 ka overseas Filipino workers (OFWs) nga gitakdang paulion gikan sa Egypt tungod sa padayon nga pag-grabe sa sitwasyon didto.
Matud pa sa Presidente, adunay inisyal nga US$240,000 nga gipadala sa Philippine Embassy sa Cairo alang sa inisyal nga repatration sa mga OFWs nga naa sa 5,000 hangtud 6,000 nga angay paulion sa nasud.
Giingong sama sa nahitabo niadtong Arab Spring sa Libay nga naa sa 4,000 ka OFWs ang gipaule ug nakakuha dayon og trabaho sa AG&P, usa ka manufacturing facility sa Batangas.
“Secretary (Rosalinda) Baldoz, I’m sure, will be preparing to assist them together with TESDA and other government entities to impart the necessary skills for reintegration. Automatic naman ‘yon for any returning OFW. Pero, dito nga, dahil nga forced, dahil nga medyo 5,000 is not an inconsequential number, I’m sure naghahanda na ‘yung mga kaukulang departamento,” matud pa sa Presidente. (PIA-Bohol/ecb)
Imbestigasyon sa ‘pork scam’, posibleng pangunahan ni Lacson – PNoy
TAGBILARAN CITY, Bohol, Aug. 22 (PIA)–Gibutyag ni Presidente Benigno ‘Noynoy’ Aquino III nga posibleng ang gidusong anti-corruption body nga pangunahan ni kanhi Senador Panfilo Lacson ang mag-imbestigar sa kontrobersyal nga ‘pork barrel scam’.
Matud pa sa Presidente, gihuwat pa niya ang rekomendasyon sa Executive Secretary kalabot sa proposed executive order ni Lacson nga nagdetalye sa mahimo niyang katungdanan.
“I will follow it up with the Executive Secretary. Medyo matagal-tagal na ring pending ‘yung proposal ni Senator Lacson,” matud pa ni PNoy.
Gawas niini, giingong aduna pay grupo sa gobyerno nga mahimong motutok sa maong anomalya.
Gitumbok sa Presidente ang Inter-agency Anti-Graft Coordinating Council (IAAGCC) nga gilangkoban sa Ombudsman, Department of Justice (DOJ), National Bureau of Investigation (NBI), Commission on Audit (COA) ug Civil Service Commission (CSC).
Hangtud karon, wala pay pinal nga posisyon alang kang Lacson. (PIA-Bohol/ecb)
