TAGBILARAN CITY, Bohol, Oct. 17 (PIA)–Gi-angkon ni Bohol Gob. Edgar Chatto nga kinahanglan pa sa mga Bol-anon karon ang ilimnong tubig ug dugangan pa ang mga pagkaon sa mga lugar nga grabeng naapektuhan sa linog.
Kini tungod kay apektado man ang tinubdan sa suplay sa tubig sa lalawigan.
Dugang pa niini ang mga panawagan sa daghang mga residente nga mga lumolopyo sa mga lungsod sa Maribojoc, Loon ug Loboc nga nangayo og tabang.
Apan giseguro karon ni Chatto nga naabot na sa mga otoridad ug rescue teams ang pila ka mga lungsod nga nahimong isolated tungod sa kusog nga pagtay-og sa linog niadtong Martes
Gipasabot sa gobernador nga gawas sa mga lungsod sa Loboc, Loon ug Maribojoc, grabe usab ang kadaut sa 7.2 magnitude nga linog sa Antequera, Calape, Tubigon, Sagbayan, San Isidro, Clarin, Inabanga ug uban pa.
Ang maong mga lugar ang nakatala og daghang mga casualties.
Gawas sa relief operations, gipahigayon usab ang retrieval operations sa Loon ug sa Maribojoc tungod sa taho nga aduna pay mga nalubong nga buhi nga kinahanglang kubkobon.
Daku ang pasalamat sa mga local nga opisyal sa Bohol sa paspas nga pagresponde sa Metro Manila Development Authority (MMDA) nga nitabang sa search and retrieval operations nga nagdala pa og mga K9 dogs.
Sa pagkakaron, gihimong receiving area alang sa pagkolekta og mga relief goods ang Bohol Cultural Center.
Matud pa ni Police Officer 3 Carl John Legazpi, Operations Clerk sa Bohol Provincial Office, nikabat na sa 145 ang gidaghanon sa mga namatay sa Bohol.
Samtang mikabat na sa 374 ang mga nataho nga naangol ug adunay 22 pa nga missing. (PIA7-Bohol/ECB)
