TAGBILARAN CITY, Bohol, Feb. 10 (PIA)–Subling nanawagan ang United Nations (UN) sa mga nasud nga miyembro niini sa paggahin pa og dugang tabang alang sa panimalay sa 360,000 ka Bol-anon nga naapektuhan sa magnitude 7.2 nga linog nga nitay-og sa Central Visayas niadtong Oktubre 15, 2013.
Nanawagan ang UN Office for the Coordination of Humanitarian Affairs (OCHA) sa mga donors nga pun-an pa ang $19 milyon o gibana-banang P885 milyon gikan sa $33.8 milyong revised Bohol action plan aron mahatag ang mga panginahanglan hangtud sa Abril alang sa mga apektadong mga lugar.
Nakahatag na ang international community og donasyon nga mikabat sa $15.1 milyon alang sa nahiunang UN recovery programs sa mga naapektuhan sa maong linog.
Giingong prayoridad karon sa UN nga mahatagan og panimalay ang mga nawad-an og puy-anan ug ibutang sa mas luwas nga lugar tungod sa linog nga nitay-og sa lalawigan sa niaging tuig ug gisundan pa gyud sa super typhoon Yolanda niadtong Nobyembre 8.
Atol sa senemanang Kapihan sa PIA niadtong Huwebes, miingon si UN-OCHA Bohol head Jock Paul nga ang mga foreign humanitarian workers wala nihatag sa ilang pondo ngadto sa mga lokal nga kagamhanan kay direkta man nila kining gi-implementar sa mga proyekto.
Apan gi-angkon usab ni Paul nga adunay pipila ka mga foreign donors nga gi-paagi ang ilang pondo ngadto sa gobyerno.
Adunay 367,580 ka residente sa Central Visayas ang gibalhin sa dihang naguba ang may 79,217 nga panimalay ug 4,617 ka eskwelahan ang naguba sa linog. (PIA7-Bohol/ECB)
