GIBANA-BANA sa Philippine Atmospheric Geo-Physical ang Astronomical Services Administration (PAG-ASA) nga magpadayon pa ang hinay ngadto sa sige-sige ug usahay bundak nga ulan nga nasinati karon, hangtud pa ugma.
Tungod niini, gilibkas na sa buhatan sa kagamhanan ang pahimangno sa pagmatngon ngadto sa mga katawhang nanimuyo duol sa mga baha-anan, sapa, sapa-sapa ug mga suba ilabi na sa Abatan, Loboc, Inabanga, Ipil ug Matul-id.
Kini nga mga bahaanan malagmit maoy apektado sa pagbaha unya dala sa pagbanlas sa ulan nga gikan sa mga kabukiran.
Gilibkas usab ang pahimangno ngadto sa mga nanimuyo duol sa mga tiilan sa mga bukid, pangpang ug bungtod, sanglit mahimong ang ulan magpahumok sa yuta ug mao unyay hinungdan sa landslides.
Una na nga namatikdang ang Tagbilaran mitala na sa 39.8 centimetro nga ulan sukad pa gahapon samtang ang silingang lalawigan sa Dumaguete nakasinati na usab sa 69.4 centimetro nga ulan sa milabay’ng 24 oras.
Kini samtang si bagyong Butchoy nga naghambin sa gikusgong 185 kilometros nga hangin dapit sa tunga niini, base sa satellite data, tua na paingon sa nasud sa Hapon.
Hinuon, may nasiplatan ang PAG-ASA nga low pressure area nga anaa sa 500 kilometros kasadpan-timog kasadpan sa Iba Zambales sa Luzon.
Kini nga kaugmaran gipaabot usab nga makaapekto sa kasubanagng kadagatan sa nasud, diin masinati ang may pagka baluron nga kadagatan. (rachiu/PIA)
