by aimee | Dec 16, 2013 | Headlines, National News
MANILA, Dec. 16 (PIA)–Nipagawas og food safety tips alang sa nagsingabot nga pagsaulog sa Pasko ug Bag-ong Tuig ang Food and Drugs Administration (FDA).
Base sa Advisory 2013-064 sa FDA nga gilagdaan ni Acting Director General Kenneth Hartigan-Go, mahinongdanon nga mag-amping sa pag-andam sa pagkaon aron masiguro nga dili madaot sa ‘food-borne diseases’ ang mga i-andam sa mga kasaulogan.
Giingong mahimong malikayan ang mga food-borne nga mga sakit ilabi na kun mag-amping lamang ang tanan.
Gitambagan sa FDA ang publiko nga unahon una ang pag-shopping sa dili pa mamalit og mga pagkaon aron masiguro nga dili dayon madaot ang mga palitong isda, karne, utanon ug prutas.
Giingong angay usab ibutang ang mga perishable grocery items buwag sa mga pre-packaged goods ug ibutang sa mas bugnaw nga lugar sulod sa sakyanan.
Ibutang dayon ang mga karne sa freezer aron malikayan ang daling pagkadaot niini ug angay nga likayan nga motulo ang dugo gikan sa karne sa bisan asang parte sa kusina tungod kay dali kining taptan og bacteria.
Angay usab nga hugasan og maayo ang tanang utanon ug prutas tungod kay kasagaran man niini gi-ispreyhan sa mga kemikal, sa dili pa ibutang sa refrigerator aron dili kini mahimong hinungdan sa kontaminasyon sa uban pang pagkaon.
Siguradohon usab nga manghugas og maayo sa mga kamot gamit ang sabon ug igong tubig sa dili pa mopunit og pagkaon alang sa mga bata ug bantayan ang mga bata sa ilang pagkaon.
Ipaseguro usab sa FDA nga makapanghunaw og kamot ang mga bata sa dili pa mokaon ilabi na kun gikan lamang kini sa pagduwa o paggunit sa mga binuhing hayop.
Angay usab nga mogamit lamang og mga gamit sa pagpangluto ug serving utensils nga limpyo.
Tambag usab sa FDA nga ilabay og maayo ang tanang salin nga pagkaon ug kun magdala og pagkaon pagpaule gikan sa party, angay mo-diretso na sa balay aron dili kini mapan-os.
Kun nagduda sa kaluwasan sa pagkaon, mas maayong ilabay na lamang kini ug dili na ipanghatag o ipakaon pa sa uban bisan sa binuhing iro. Tambag pa sa FDA, mas maayong mokunsulta dayon sa doktor kun nagdudang na-igo sa food-borne illnesses. (PIA7-Bohol/ECB)
by aimee | Dec 16, 2013 | National News
MANILA, Dec. 16 (PIA)–Magdeklarar og unilateral ceasefire ang gobyerno sa Communist Party of the Philippines-New People’s Army (CPP-NPA) karong Kapaskohan.
Matud pa ni Presidential Spokesperson Edwin Lacierda, naglaum silang mosunod usab ang grupo sa higayong ipatupad na nila ang maong unilateral ceasefire.
Matag tuig kining i-deklarar sa gobyernong Aquino ug gipaabot na lamang nila ang rekomendasyon sa Department of National Defense (DND).
Tuyo niining mahatagan og kahigayonan ang mga sundalo nga makauban ang ilang mga mahal sa kinabuhi karong panahon sa Pasko.
Giseguro sa Malakanyang nga kaya pa gihapon nga panalipdan sa tropa sa gobyerno ang katawhan bisan ipatuman ang maong ceasefire. (PIA7-Bohol/ECB)
by aimee | Dec 16, 2013 | Headlines, National News
MANILA, Dec. 16 (PIA)–Gipasigarbo ni Presidente Benigno ‘Noynoy’ Aquino III sa iyang pag-abot kagahapon gikan nitambong sa 40th ASEAN-Japan commemorative summit ang mga ‘good news’ nga iyang dala.
Gibutyag sa Presidente nga gi-aprubahan na sa Japanese International Cooperation Agency (JICA) ang $184 milyon nga pautang aron makapalit og 10 ka barko ang Philippine Coast Guard (PCG) nga magbantay sa atong kadagatan.
“Bago tayo lumipad pauwi, tuloy pa rin ang pagdating ng good news. Nalagdaan na po ang $184 million na pautang mula sa Japan International Cooperation Agency para makabili ng sampung Coast Guard vessels na magbabantay sa ating mga baybayin,” matud pa sa Presidente sa iyang arrival message sa Ninoy Aquino International Airport Terminal 2 niadtong Domingo.
Gipaabot nga ang maong 10 ka bag-ong multi-role nga barko sa PCG magamit na sa 2015 human ang bidding process niini.
Nagpasalamat usab si Presidente Aquino kang Japanese Prime Minister Shinzo Abe sa tabang niini sa mga biktima sa bagyong Yolanda ilabi na ang pagpadala niini og mga personnel nga mitabang sa search and recovery operations sa Tacloban City. (PIA7-Bohol/ECB)
by aimee | Dec 13, 2013 | Headlines, National News
MANILA, Dec. 13 (PIA)–Dili na kinahanglang mokanaug pa sa puwesto ang 422 elected officials kun matarong nila dayon ang ilang Statement of Contributions and Expenditures (SOCE).
Kini ang gitataw sa tigpamaba sa Commission on Elections (COMELEC) nga si James Jimenez human una nang gimanduan sa poll body kagahapon ang maong mga napiling opisyal nga biyaan ang ilang posisyon kun dili dayon makaduso o matarong ang ilang mga SOCE.
Gitambagan ni Jimenez ang maong mga napiling opisyal nga sundon lang tanan ang kinahanglang himuon sa ilang SOCE sama sa prescribed form, signatory requirements ug uban pa ug bayran ang administrative fines, usa iduso sa ilang buhatan.
“As far as we are concerned, if they can correct naman [their] deficiencies, hindi na nila kailangang bumaba [sa pwesto], ayusin na lamang nila ang kanilang submissions. Sundin lang natin ang… prescribed form, sundin lamang ang signatory [requirements], tapos na ang usapan diyan,” matud pa ni Jimenez.
Gipasabot usab ni Jimenez nga gi tagsa-tagsa na og subay sa poll body ang matag dokumentong giduso sa ilang buhatan ug nadiskubre nilang adunay mga napiling opisyal nga wala pa niduso sa ilang SOCE, ang uban adunay deficiency ang SOCE o di kaha dili personal nga milagda sa ilang SOCE. (PIA7-Bohol/ECB)
Expiry date sa mga gift checks, gi-bawal na
MANILA, Dec. 13 (PIA)–Nagpagawas karon og kamanduan ang Department of Justice (DoJ) aron ibawal ang pagbutang og expiry date sa mga gift certificates.
Ang gipagawas nga kamanduan ni Justice Secretary Leila de Lima agig pagsunod sa Administrative Order No. 10-04 series of 2010 nga nag-bawal sa pag-isyu og mga gift certificates, checks ug cards nga adunay nakabutang nga expiry dates.
Giingong ang gift certificates susama na sa cash nga walay expiration date.
Tungod niini, bawal na sa mga kumpanya ang pagbutang og expiry date sa bisan unsang gift checks ug gift cards samtang nagkaduol na ang pagsaulog sa Pasko ug Bag-ong Tuig.
Una nang nipagawas ang Department of Trade and Indiustry (DTI) og kamanduan nga nagbawal sa mga supplier og gift checks, checks ug cards nga nagtakda og expiry date. (PIA7-Bohol/ECB)
by aimee | Dec 13, 2013 | National News
MANILA, Dec. 13 (PIA)–Hingpit nga nipasidaan si Commission on Elections (COMELEC) Chairman Sixto Brillantes, Jr. sa mga opisyal ug kawani sa poll body batok sa pag-solicit o pagdawat og bisan unsang regalo karong panahon sa Pasko.
Matud pa ni Brillantes, mahimong pamultahon o ma-dismiss sa serbisyo ang mga kawani nga modawat o mangayo og bisan unsang regalo, ma cash man o in kind.
Pasabot ni Brillantes, ang bisan unsang regalo makonsederar nga suhol, ilabi na kun gikan pa sa usa ka tawo nga adunay nag-ungot nga kaso sa poll body.
“Gifts, especially cash, may be construed as a bribe. That’s equivalent to indirect bribery especially if the one giving has a pending case here,” matud pa ni Brillantes.
Apan sa mga mamugos gayud nga mohatag og regalo sama sa pagkaon, mahimong may exemption kini tungod kay mahatag man kini sa uban.
Gisiguro usab ni Brillantes nga istrikto nilang gipatuman ang mga gi-dili nga gitakda sa Republic Act 6713 o ang “Code of Conduct and Ethical Standards for Public Officials and Employees,” nga naglatid nga ang bisan kinsang opisyal ug kawani sa gobyerno dili angay mag-solicit o modawat og bisan unsang regalo, gratuity, pabor, entertainment, loan o bisan unsang adunay monetary value, direkta man o indirekta.
Ang molapas niini mahimong pahamtangan og multa nga dili molapas sa unom ka buwang sweldo niini o suspensiyon nga dili molapas sa usa ka tuig, o pagkatangtang sa serbisyo, depende sa gibug-aton sa salang nahimo.
Kasamtangang naa sa proseso karon ang COMELEC sa pagdungog sa mga election protest case nga gikan sa nahuman lamang sa piniliay sa nasud. (PIA7-Bohol/ECB)
