by aimee | Dec 12, 2013 | Local News / Bohol Balita
TAGBILARAN CITY, Dec. 12 (PIA)–Mga lokal ug langyaw’ng trabaho itanyag na usab sa Kagamhanang Probinsyal sa Bohol inabagan sa mga nasudnong ahensiya ug lehitimong recruiters.
Ang maong jobs fair ipahigayon sa Island City Mall (ICM) Activity Center karong Sabado, Disyembre 14 gikan sa alas 8 sa buntag hangtud sa alas 5 sa hapon.
Itanyag dinhi ang mga lokal ug langyaw nga trabaho sa konstruksyon, engineering, hotel ug restaurant, BPO call center, retailing, sales ug merchandising, manufacturing, ug general administration.
Matud pa ni BEPO chief Romulo Tagaan, gikinahanglan ang comprehensive resume/biodata, diploma, transcript of records, training o employment certificate, passport, NBI clearance, 2×2 ID photos ug uban pa.
Kinahanglang magpalista daan ang mga aplikante sa Bohol Employment and Placement Office (BEPO) sa kapitolyo o kaha sa lokal nga buhatan sa Department of Labor and Employment (DOLE) ug employment service office sa mga kalungsoran aron makakuha og registration cards.
Ang maong jobs fair gitanyag sa buhatan ni Gob. Edgar Chatto pinaagi sa BEPO ug sa pakigtambayayong sa DOLE, POEA, OWWA, kahugpongan sa mga PESO managers sa Bohol ug mga accredited recruitment agencies.
Alang sa dugang detalye, mahimong motawag sa BEPO sa mga numero 501-9847 ug 411-3544. (PIA7-Bohol/ECB,with reports from BEPO)
by aimee | Dec 12, 2013 | Headlines, Local News / Bohol Balita
MANILA, Dec. 12 (PIA)–Ang National Housing Authority (NHA) nipagawas na og P388 milyon nga pondo ngadto sa local government units alang sa pagpaayo ug pagpatukod sa mga nangagubang balay sa Bohol.
Kini matud pa ni Bise Presidente Jejomar C. Binay diin iyang gipasabot nga ubos sa Housing Materials Assistance (HOMA), ang NHA mohatag og P10,000 sa matag pamilyang naguba ang balay tungod sa 7.2 magnitude nga linog nga nitay-og sa Bohol niadtong Oktubre 15.
“The government remains committed in helping the earthquake victims rebuild their lives. This is only the start,” matud pa ni Binay.
Gibutyag ni Binay nga ang mga lungsod sa Maribojoc ug Antequera nakadawat na og tseke nga nagkantidad og P33,470,000 ug P31,780,000.
Giingong personal kining gitunol sa Bise Presidente ngadto kang Mayor Leoncio Evasco ug Mayor Jose Mario Pahang sa iyang pagbisita sa Bohol niadtong Nobyembre.
Matud pa nga mahimo na usab makuha ang mga tseke alang sa mga lungsod sa Tubigon, San Isidro, Catigbian, Sagbayan, ug Loon.
Gibutyag sa National Disaster Risk Reduction and Management Council (NDRRMC) nga ang maong linog nakaguba sa 73,002 ka mga balay (14,512 totally damaged ug 58,490 partially damaged) sa Bohol, Cebu, Negros Occidental, Negros Oriental, Iloilo, Siquijor ug Guimaras.
Si Binay una nang nitukod og multi-agency task force nga maoy mitino sa mga panginahanglan sa balay sa mga lumolopyo sa Central Visayas kinsang mga panimalay nangaguba sa linog niadtong Oktubre 15.
Gawas sa shelter agencies ubos sa Housing and Urban Development Coordinating Council (HUDCC), ang Bohol-Cebu housing rehabilitation task force mag-apil usab sa Department of Environment and Natural Resources (DENR), Department of Public Works and Highways (DPWH), Department of Social Welfare and Development (DSWD) ug sa Department of Interior and Local Government (DILG).
Ang HUDCC gilangkoban sa NHA, Home Development Mutual (Pag-IBIG) Fund, Home Guaranty Corporation, Housing and Land Use Regulatory Board, National Home Mortgage Finance Corporation, ug sa Social Housing Finance Corporation. (PIA7-Bohol/ECB,with reports from NHA)
by aimee | Dec 11, 2013 | National News
MANILA, Dec. 11 (PIA)–Gipaabot sa Pilipinas ang dugang investments gikan sa nasud sa Japan human sa adoption sa Japanese standard sa digital television.
Matud pa ni Philippine ambassador to Japan Manuel Lopez, pipila ka kumpanyang Hapon ang interesadong magtukod og mga kumpanyang mohimo sa gikinahanglang equipment sama sa set-top box.
Si Lopez nagkanayon nga dakung butang kini isip oportunidad sa pagmugna og mga trabaho sa Pilipinas.
“We expect to see some Japanese companies set up shop in the Philippines to produce things like set-top boxes and other items related to the digital TV and we can expect employment and opportunities for Filipinos in this area of business,” matud pa ni Lopez.
Dugang pa ni Lopez nga gipaabot na sa Pilipinas nga mapalig-on niini ang usa ka automotive road map.
Kun matuman kini, madugangan ang aktibidad sa Pilipinas og mga Hapones nga tighimo og mga sakyanan.
Una nang gibutyag ni Presidential Communications Operations Office (PCOO) Secretary Herminio Coloma Jr. nga gamiton sa Pilipinas ang Integrated Service Digital Broadcasting Terrestrial (ISDB-T) standard sa Japan.
Giingong gi-pili sa gobyerno ang maong standard human gi-rekomendar sa Kapisanan ng mga Brodkaster ng Pilipinas (KBP) tungod sa emergency alarm system nga magamit sa oras sa kalamidad. (PIA7-Bohol/ECB)
by aimee | Dec 11, 2013 | Headlines
MANILA, Dec. 11 (PIA)–Subling nagpahinomdom ang Department of Labor and Employment (DOLE) sa mga employer sa pribadong kompanya sa paghatag sa 13th month pay sa ilang mga empleyado.
Sa gipagawas nga labor advisory, miingon si Labor Secretary Rosalinda Baldoz nga ang paghatag sa 13th month benefit maoy pag-ila sa mga trabahante nga maoy nag-unang puwersa sa productivity, competitiveness ug profitability sa kompanya.
Agig pagsunod na usab sa Presidential Decree No. 851 ug sa Implementing Rules and Regulations, ang mga employer obligadong mohatag og 13 month pay sa ilang mga trabahante.
Kun ang usa ka empleyado nagtrabaho na sa kumpanya og kinatibuk-ang usa ka tuig, makadawat siya og usa ka buwang suweldo isip 13th month pay.
Kini kinahanglang mahatag sa mga empleyado nga nagtrabaho nga dili mo-ubos sa usa ka buwan sulod sa kinatibuk-ang tuig o sa paghidangat sa Disyembre 24 nga walay gi-piling employment status.
Mahimong ihatag sa mga employers ang katunga sa 13th month benefits sa dili pa ang pagbubukas sa regular school year sa Mayo o Hunyo samtang ang nahabiling katunga ihatag sa dili pa Disyembre 24.
“The 13th month pay must be paid on or before 24 December of every year. This year, the 24th of December falls on a Tuesday, so employers may pay their workers the 13th month benefit on this day, but I urge them to pay earlier to avoid the rush,” matud pa ni Baldoz. (PIA7-Bohol/ECB)
by aimee | Dec 10, 2013 | Headlines, National News
MANILA, Dec. 10 (PIA)–Opisyal nang gitudlo ni Presidente Benigno ‘Noynoy’ Aquino III si kanhi Senador Panfilo Lacson III isip Presidential Assistant for Rehabilitation and Recovery.
Sa gipagawas nga Memorandum Order No. 62, nakalatid didto ang mga katungdanan ni Lacson gamit ang iyang bag-ong posisyon nga adunay cabinet rank ubos sa Office of the President.
Usa sa mahinongdanong katungdanan niini ang mahimong over-all manager ug coordinator sa rehabilitation, recovery ug reconstruction efforts sa government department ug ahensiya sa gobyerno.
Partikular nga pagatutokan ni Lacson ang mga lugar nga naapektuhan sa bagyong Yolanda nga mao ang Samar, Leyte, Negros, Cebu, Bohol, Capiz, Aklan, Antique, Iloilo ug Palawan.
Giingong kinahanglan usab makig-alayon si Lacson sa National Disaster Risk Reduction and Management Council (NDRRMC) ug mga ahensiya sa gobyerno nga miyembro niini ug mopahigayon og konsultasyon sa mga hingtungdang Local Government Units (LGUs) sa aspeto sa plano ug programa alang sa rehabilitasyon, recovery ug development sa mga naapektuhang lugar sa bagyong Yolanda.
Apil na usab niini ang over-all strategic vision ug integrated short-term, medium-term ug long-term programs nga iduso kang Presidente Aquino alang sa iyang pagtugot.
Samtang gitudlo usab ni Presidente Aquino si kanhi Chief Operating Officer sa Eton Property Phil. Inc. nga si Danilo A. Antonio isip Undersecretary ni Lacson.
Tungod niini, ang tanang departamento, ahensiya, apil na ang GOCCs , GFIs ug pribadong sektor gimanduan nga suportaan ug tabangan si Lacson isip bag-ong Presidential Assistant for Rehabilitation and Recovery. (PIA7-Bohol/ECB)
