by aimee | Nov 29, 2013 | Headlines, National News
TAGBILARAN CITY, Nov. 29 (PIA)–Gimando karon ni Presidente Benigno “Noynoy” Aquino III sa tanang mga government financial institutions (GFIs) ang pagpatuman sa unom ka buwang moratorium sa paningil og loan payments ug paghatag og interest-free loans sa mga residente o negosyanteng direktang naigo sa bagyong “Yolanda”.
Nahisulod kini sa Memorandum Circular No. 59 nga gilagdaan sa Presidente niadtong Nobyembre 26 nga gipagawas na karon sa Malakanyang.
Apil niining kamanduan ang Land Bank of the Philippines (LBP), Development Bank of the Philippines (DBP), Government Service Insurance System (GSIS), Social Security System (SSS), National Home Mortgage Finance Corporation-PAGIBIG, People’s Credit and Finance Corporation, Philippine Postal Savings Bank, Philippine Retirement Authority, Quedan Rural Credit and Guaranty Corporation ug United Coconut Planters Bank.
Tuyo niining matabangan ang mga biktima nga makuhaan ang ilang problema ug makabawi sa gidangatan nga trahedya. (PIA7-Bohol/ECB)
by aimee | Nov 29, 2013 | National News
TAGBILARAN CITY, Nov. 29 (PIA)–Gitataw ni Presidente Benigno “Noynoy” Aquino III nga walay angay ikabalaka sa napabalitang adunay Chinese aircraft carrier nga naa sa West Philippine Sea.
Atol sa media interaction sa Presidente nga gipahigayon sa Bohol Tropics Resort sa syudad sa Tagbilaran kagahapon sa buntag, gipasabot niini nga dili hulga sa seguridad sa nasud ang maong balita tungod kay wala kini sa territorial waters sa West Philippine Sea apan anaa sa High Seas.
Dugang pa sa Presidente, gi-angkon man sa China nga dili pa kini operational ug nagpahigayon lamang kini og pagbansay-bansay sa carrier operations.
Gipahayag sa Presidente nga matawag kining innocent passage mao nga dili angay padak-on o ikabalaka.
“Let’s not play it up. I think the Chinese themselves have admitted that this is a… They are not yet fully operational eh. Is it two or three years ba before they believe that they will be fully operational. Ibig sabihin ‘non, they’re learning carrier operations, both the crews onboard the planes and also the pilots who will be flying the planes. So they are transitting here, dahil hindi pa sila operational, why should anybody consider it a threat?” matud pa ni Presidente Aquino. (PIA7-Bohol/ECB)
by aimee | Nov 29, 2013 | Headlines, National News
TAGBILARAN CITY, Nov. 29 (PIA)–Giseguro ni Presidente Benigno “Noynoy” Aquino III nga lig-on ang mga inprastrakturang ipatukod dungan sa pasalig nga subling ipatindog ang mga naguba o nahugnong mga inprastraktura tungod sa linog nga nitay-og sa lalawigan niadtong Oktubre 15.
“Rebuild all that needs to be rebuilt but in a much better condition so they would be able to withstand natural calamities, ” matud pa ni PNoy atol sa gipahigayong media interaction kagahapon nga gipahigayon sa Bohol Tropics Resort ning syudad sa Tagbilaran.
Matud pa ni PNoy nga ang duha ka tulay nga gihimo karon sa Bohol kasamtangan lamang human kini nahugno tungod sa magnitude-7.2 nga linog sa niaging buwan.
“Temporary bridges were being inaugurated today. Bakit temporary? Kasi maraming tests na kailangang gawin pa. Tests to make sure na ito ba ay ang best site,” pasabot ni PNoy.
Gipasalig pa ni PNoy nga mahuman ang permanenteng Abatan bridge sa Setyembre 2016.
Samtang gitahasan sa Presidente ang Department of Health (DoH) sa pagtukod og bag-ong district hospital sa Loon, human nahugno usab sa linog ang Congressman Castillo Memorial Hospital sa maong lungsod.
“Pati hospitals… I tasked DOH to make sure that program to build a new one, perhaps in a different location,” pagbutyag sa Presidente.
Ang National Housing Authority (NHA) ug Department of Social Welfare and Development (DSWD) usab ang giingong mamahala sa mga residente nga wala pay mapuy-an human sa bagyong “Yolanda.”
Samtang masaligon ang Presidente nga mabalik na sa ubang lugar sa Visayas region ang suplay sa kuryente sa Disyembre.
Gipasalig sa Presidenteo nga adunay igong pondo nga gigahin ang gobyerno alang sa rehabilitasyon sa mga lugar nga naigo sa niaging mga kalamidad. (PIA7-Bohol/ECB)
by aimee | Nov 28, 2013 | National News
TAGBILARAN CITY, Nov. 28 (PIA)–Gibutyag ni Presidente Benigno “Noynoy” Aquino III ang kapin sa P5 bilyon nga pondo alang sa rehabilitasyon sa Bohol human gitay-og ang lalawigan sa 7.2 magnitude nga linog niadtong Oktubre 15.
Nibalik ang Presidente sa Bohol karong adlawa sa ikatulong higayon human sa linog sa niaging buwan aron pangunahan ang inspeksyon sa mga nagubang imprastraktura.
Matud pa ni Presidente Aquino, gamiton ang pondo sa pagtukod og mga imprastrakturang dili daling maguba sa bagyo ug linog.
Giingong apil na niini ang mga bag-ong dalan ug tulay nga mahinungdanon sa transportasyon.
Kahinumdomang naguba ang mga nag-unang dalan sa Bohol sa linog apil na sa mga tunghaan, simbahan ug uban pang public establishments.
Samtang, kinatibuk-ang P289 milyon usab ang gisugyot nga pondo sa Department of Health (DoH) sa Malakanyang alang sa rehabilitasyon sa mga health facilities nga naguba sa kusog nga linog.
Matud pa ni DoH Sec. Enrique Ona nga sa maong kantidad, kapin sa P80 milyon ang alang sa mga rural health units samtang ang kapin sa P45 milyon alang sa mga barangay health centers.
Giingong mokabat sa P163 milyon ang kinahanglanong pondo alang sa pagpaayo sa pipila ka mga nagubang tambalanan ug pagpatukod og mga bag-ong tambalanan.
Si Ona nagkanayon nga usa lamang kini sa gi-prisintar nilang report kang Presidente Aquino karong adlawa didto sa Bohol Tropics Resort.
Sa kinatibuk-an, miingon si Ona nga 169 ang kinatibuk-ang mga pasilidad nga naguba diin 21 niini ang totally-damaged ug ang nahabilin alang sa partially-damaged.
Gipasalig usab ni Ona nga magtukod og bag-ong tambalanan sa lungsod sa Loon gamit ang hiniusang pondo gikan sa DOH ug LGU-Loon. (PIA7-Bohol/ECB)
by aimee | Nov 19, 2013 | National News
MANILA, Nov. 19 (PIA)–Gi-deklarar sa Supreme Court (SC) nga supak sa batakang balaod ang Priority Development Assistance Fund (PDAF) o mas gi-ila sa tawag nga pork barrel.
Sa botong 14-0, gipaboran sa mga hukom ang petisyon nilang Greco Belgica ug Samson Alcantara human nila gi-kuwestiyon ang giingong maanomalya nga pondo.
Base sa resolusyon sa Korte Suprema, nakitaan og igong basehan ang reklamo sa mga petitioner mao nga gipaboran sila sa mga mahistrado sa SC.
Matud pa ni Senior Associate Justice Antonio Carpio, “facially unconstitutional” ang PDAF.
Nagpasabot usab kini nga dili na mahimong gamiton sa Presidente ang salapi gikan sa Malampaya Gas Field alang sa ubang butang gawas na lamang sa mga proyektong pang-enerhiya.
Gimando sa SC ang imbestigasyon sa mga ni-abusar sa PDAF.
Gitataw usab sa taas nga hukom nga permanente na ang gipagawas nilang temporary restraining order batok sa PDAF.
Tungod niini, dili na ipagawas sa Department of Budget and Management (DBM) ang nahabiling pondo alang sa tuig 2013.
Migawas ang anomalya sa pork barrel human nipagawas ang Commission on Audit (COA) og special report sa maong pondo.
Nakadugang pa niini ang pagkalambigit sa mga senador ug kongresista sa pork barrel fund scam.
Pipila sa mga gipasakaan og kaso nga plunder sa Office of the Ombudsman silang Senador Jinggoy Estrada, Ramon “Bong” Revilla Jr., Juan Ponce Enrile ug apil na sa ilang mga staff. Apil na usab niini ang “pork barrel queen” nga si Janet Lim Napoles.
Samtang gilambigit usab sa Malampaya Fund scam sila kanhi Presidente Gloria Macapagal Arroyo, kanhi Executive Secretary Eduardo Ermita ug 22 pa ka kanhi opisyal sa gobyerno.
Gipagawas ang desisyon sa SC nga supak sa batakang balaod ang pork barrel human ang duha ka buwang deliberasyon sa tulo ka petisyon batok niini. (PIA7-Bohol/ECB)
