by anyajulia | May 8, 2009 | Headlines, Major Events
DUNGAN NGA medical mission sa umaabot Septembre 6 ug kini mag-alagad sa tanang barangay sa tibuok Pilipinas atol sa ika 75 ka tuig nga kasumaran sa Philippine Charity Sweepstakes Office (PCSO).
Kini maoy giplanohag maayo sa mga tinugyanan sa PCSO, ug aron makompleto ang mga lumilihok, gipahiluna dungan sa ilang Charity Caravan ang paglusad sa Kaibigan ng PCSO dinhi sa Bohol.
Ang Kaibigan ng PCSo usa ka bahan sa mga moboluntaryo nga medical workers alang sa maong kalihukan. Ang mga moboluntaryo mao usay mamahimong buhi nga kaabag sa PCSO sa ilang mga umaabot pang kalihukan dinhi.
Human sa 140 ka oras nga pagboluntary sulod sa unom ka buwan, hatagag senior status ang Kaibigan ug makadawat kinig mga benepisyo nga tanyag sa ahensya. (rachiu/PIA)
by anyajulia | May 8, 2009 | Headlines, National News
DILI angay kahadlokan ang kwarantina, pahimangno sa Department of Health.
Pasabot ni Health Secretary Francisco T. Duque III, ang pagkwarantina pagseguro lamang nga kapanalipdan ang publiko sa hulga sa Influenza A o ang A H1N1 ug dili pagpakauwaw.
Kasamtangang gipahigayon ang pagpaagi sa thermal scanning ang tanang pasahero sa mga airport ug pantalan aron hibaw-an kon may simtomas ba sa hilanat nga dala sa A H1N1.
Mi-aghat usab si Sec. Duque nga kadtong mga Pinoy nga gikan sa mga lugar nga apektado sa sakit unta maghimog kinaugalingon nga kawrantina ug pagpanalipod sa kaugalingon aron dili makatakod.
Kasamtangang gipailawom sa DOH ang 10 ka tawo sa obserbasyon kon apektado ba sa H1N1. Kini hinoun, gipatin-aw sa DOH nga gidudahan lamang ug mahimong dili sila carrier sa sakit. (rachiu/PIA)
by anyajulia | May 7, 2009 | Headlines, National News
TIGUMON sa mga tinugyanan sa Department of Education ang mga supervisors didto sa Villalimpia Loay karong Lunes aron mahipno na ang listahan sa mga scholars nga malakip sa programang One-Town-One Scholar (OTOS) ni Presidente Gloria Macapagal Arroyo.
Sa tigum, butyag sa DepEd pinaagi ni Mrs Tarcisia Quilatan nga mahibaw-an na gayud kon kinsa sa matag usa sa 47 ka lungsud ang makatagamtam sa libreng patungha nga gitumong aron kahatagag higayon kadtong mga kabus apan may maayog pangutok nga makapadayon sa pagtuon.
Kon mapailawom sa programa, bayran sa kagamhanan ang upat o lima ka tuig sa mga estudyanteng mosulod sa kolehiyo kinsa napili isip scholar sa matag lungsod.
Ang scholar kinahanglang hinuon nga malakip sa Top 10 sa graduating class ug mo-apply sa tunghaan, mopasar sa eksaminasyon ug screening sa lungsod pinaagi sa buhatan sa mayor ug sa DepEd.
Kon makalabang, ang scholar makadawat ug stipend nga P15Mil matag semester ug libreng makasulod sa pinaka-duol nga state college o university sa iyang lugar. (rachiu/PIA)
by anyajulia | May 7, 2009 | Headlines, National News
GIPAPUNDOHA’G P25M ni Presidente Gloria Macapagal Arroyo ang kampanya sa hingpit na nga paglubong sa mga politikanhong pagpamatay, butyag ni Executive Secretary Eduardo Ermita sa mga tigtaho.
Ang lakang, pasabot ni Ermita, timailhan sa kasibot sa nasudnong kagamhanan sa pagsumpo sa politikanhong pagpamatay, o kadtong gituohang gipitlok sa rasong sila gidudahang militante o sakop sa media nga mitaho sa kamatuoran.
Kuhaon sa pundo, sumpay ni Ermta ang para ipalit og ekipos alang sa foresics ug bansaybansay sa mga tigpatuman sa balaod sa pagbuhat sa ilang mga responsibilidad.
Nalakip sa mg ahensyang makabenepisyo sa pundo mao ang Department of Interior and Local Government (DILG) pinaagi sa Philippine National Police, ang Department of National Defense pinaagi sa Armed Forces of the Philippines, o ang Secretary of Justice pinaagi sa National Bureau of Investigation.
Gidugang niya nga ang pundo mao usay tinubdan alang sa witness protection program. (rachiu/PIA)
by anyajulia | May 7, 2009 | Foreign Exchange, Headlines
TULO ka kasabutan ang nalagdaan tali sa Pilipinas ug sa nasud sa Syria samtang mibisita si Presidente Gloria Macapagal Arroyo ug ang iyang bahan sa Damascus.
Matud ni Press Secretary Cerge Remonde, ang mga kasabutan naglangkob sa katukoran sa mga konsultasyon, kulturanhong pagtinabangay, ug paglingkawas sa visa sa mga tawong naghupot ug opisyal ug diplomatic nga pasaporte sa ilang pagsulod sa bisan asa sa duha ka nasud.
Ang kasabutan gilagdaan nila ni Presidente Arroyo ug Syrian President Bashar Al-Assad dili pa lang dugay. (rachiu/PIA)
