by boholbalita | May 5, 2010 | Local News / Bohol Balita
Luwas ang 50 kapin ka pasahero sa silver star bus, usa ka depasaheroang bus nga nagbiyahe sa Manila-Bohol, human kining ni balitok ug nibay-ad sa konkretong railings sa Camambugan Bridge, sakop sa Poblacion, lungsod sa Trinidad ganinang kaadlawon.
Gikan ang maong bus sa Ubay human kining nikanaog sa barge nga nagdala niini gikan sa Leyte.
Ang 50 kapin ka mga pasahero kasagaran nangule alang sa lungsod sa Pilar, Alicia ug Jagna.
Matod pa, kusog ang dagan sa bus nga naglisod na kinig bawi sa dihang niliko pasulod sa disgrasyadong taytayan. (Johnlo Prismark Raden)
by boholbalita | May 5, 2010 | Local News / Bohol Balita
Tungod sa giingong dili maayo ug salawayong serbisyo sa mga kawani, management, personnel ug staff sa Garcia Memorial Provincial Hospital (GMPH) sa lunsod sa Talibon, usa kanhi ka opisyal sa Department of Education (DepEd) ang mipasaka ug reklamo ngadto sa Provincial Health Office sa lalawigan aron pagpanawagan nga i-monitor, i-evaluate ug imbestigaron ang pagpadagan sa maong tambalanan nga gipuno karon sa mga pagsaway.
Si Dr. Rasalinda D. Evangelista, Ph. D. pormal nga mipasakag letter of complaint sa kadagkuan sa probinsiya nga gipetsahan ug Abril 28, 2010 nga gisukipan pa sa mga affidavit sa laing 3 ka magtutudlong nagpalig-on sa reklamo.
Apil sa mga gihatagan sa kopya sa reklamo mao si Gobernador Erico Aumentado, Regional Health Officer, Secretary sa Departamento sa Panglawas (DoH), Mr. Romeo Teruel, HRM officer sa capitolyo, ug ang Ombudsman sa Kabisay-an.
Nitumaw ang reklamo tungod sa matud pa, dili maayong pagtratar sa usa ka pasyente sa biktima sa disgrasya sa kadalanan sa niaging buwan, ug ang dili tawhanong pag-atiman sa patayng lawas sa kauban niining apil sa disgrasya nga igsoon ra usab sa pasyente.
by boholbalita | May 4, 2010 | Headlines, Local News / Bohol Balita
Human sa duha ka bulan kapin nga pagtagu-tago, nadakpan ang na ang gikaintapang suspetsado sa paglugos-patay sa usa ka 7-anyos nga batang babaye nga si Emilio Panillon human gipusil ug natigbasan sa amahan sa biktima didto sa umahan sa pamilya sa suspek didto sa Sitio Calumbagan, barangay Bantolinao, Antequera, Bohol kagahapon sa buntag.
Nasyran sa taho nga si Panillon naigo sa walang bahin sa iyang lawas diin ang bala niini nisud ngadto sa tiyan ug dunay dakong samad tinigbasan sa tuong bahin sa iyang kiting ug gidala didto sa Gov. Celestino Gallares Memorial Regional Hospital sa Dakbayan sa Tagbilaranug gi operahan sa iyang mga samad.
Si SPO1 Godofredo Padillo sa Antequera Police Station kinsa maoy nibantay kang Panillon sud sa operating room nibutyag sa Bohol Balita nga ang suspek gi hup-an ni Artemio Baldisco pasado alas 10 sa buntag human niini nahibaw-an nga nagpakopras ang mga igsuon niini ug niballik aron mangayo sa iyang bahin.
Matud ni Padillo nga unang gipusil ni Baldisco si Panillon gamit ang usa ka airgun ug pagkahuman nisuway kini og dagan apan naapsan kini og dagan ug nag inilugay sila sa lagaraw apan nakuha kini ni Baldsico ug maoy gigamit sa pagtigbas sa tuong kiting ni Panillon.
Niingon si Padillo nga nangayo ug tabang si Baldisco hinungdan sa niabot ang iyang mga silingan ug mga barangay tanod. “Natumba na si Emeliosa yuta ug gidayungan na sa among pag-abot,” asoy pa ni Padillo.
Nipuno si Padillo nga tiwasan unta ni Baldisco ang suspetsado apan gihangyo kini nga itugyan nalang sa kapulisan.
Gibutyag usab ni Padillo nga ilang nakita nga dunay sapaw sa lubi sa baba ni Panillon nga maoy iyang sagad kan-on atol sa iyang pagtago-tago.
Unang nitumaw nga balita nga mu surrender si Emelio pagkahuman sa eleksyon ug matud pa mopatay una ug pito ka tawo lakip na si Baldisco nga maoy naggukod kaniya.
Sa pagsikop ni Panillon makaginhawa na ang katawhan sa Antequera ug mga kasikbit nga lungsod nga mahadlok sa suspek ilabina sa kagabhion.
Si Baldisco kinsa maoy amahan sa biktima nga si Arriane Kaye Bulig malagmit makadawat sa ganti nga P40,000 nga ihatag sa local government unit sa Antequera ubos ni Mayor Cecille Rebosura.
Sayo niini, si Bulig nakit-an patay mga alas 6 sa buntag niadtong Pebrero 25 ning tuiga human kini gikatahong gidakdak ang ulo sa salog dihang gilugos sa suspetsado.
Sa wala pa mahitabo ang krimen, nakig-inom ang natumbok nga suspetsado uban ni Baldisco ug usa ka silingan nga si Rogelio Renegado. (Andy Nalzaro)
by boholbalita | May 4, 2010 | Local News / Bohol Balita
Patay dihadiha dayon ang duha ka manginhasay og kinhason lakip na ang usa ka 15 anyos nga batang lalaki samtang naospital ang kauban nga dalagita human naigo sa liti didto sa baybayon sa Catagbacan Norte, Loon, Bohol niadtong Miyerkules sa hapon.
Ang mga biktima nailhan nga sila si Arcelita Palo, 46-anyos, minyo, ug Marlon Manlupig, 15 anyos pulos nagpuyo sa maong lugar. Samtang usa ka Meann Modreondo, 15-anyos naka angkon ug daghang paso sa iyang lawas ig gidala didto sa Ramiro Community Hospital sa dakbayan sa Tagbilaran.
Nasayran sa taho nga samtang ang mga biktima nanginhas ug tuway sa daplin sa baybayon sa maong dapit mga alas 4:30 sa hapon dihang nisipa ang makusog nga tingog sa liti ug nahurot sila ug kaigo. Matud sa taho nga wala damha sa mga biktima ang naasoy nga trahedya gumikan kay naatol man kini sa sa panahon nga ting-init. (Andy Nalzaro)
by boholbalita | Apr 28, 2010 | Local News / Bohol Balita
Namatay ang usa ka lalaki human nasobrahan sa ilimnong makahubog didto sa basketball court didto sa barangay Malinao East, Lila, Bohol niadtong Sabado.
Biktima nailhan nga si Teodomiro Raut, 48-anyos, minyo, ug nagpuyo sa maong lugar.
Nasayran sa taho nga sa wala pa ,ahitabo ang insidente, nakit-an ang biktima nga nakigtagay sa iyang mga higala gikan ala-una sa hapon niadtong Biyernes ug naabtan ang ilang panag inom hangtud alas 11:3- sa gabii.
Katapusang makit-an nga buhi ang maong biktima sa naasoy nga oras ug pagka-alas 5 sa buntag sa Sabado, naplagan ang patay’ng lawas niini nag buy-od na sa basketbol court sa maong dapit.
Sigun sa pakisusi sa municipal health officer, nga namatay ang maong biktima gumikan sa sobrang inom ug walay tinunto nga nagpaluyo sa kamatayon niini. (Andy Nalzaro)
