by aimee | Feb 3, 2014 | Headlines
MANILA, Feb. 3, 2014 (PIA)–Iduso sa Department of Science and Technology (DOST) ang pagbaton og usa ka advisory system nga magpasidaan batok sa storm surge.
Sa gidusong plano sa ahensya kang Presidente Benigno “Noynoy” Aquino III, magbaton og tulo ka matang sa storm surge advisory (SSA) nga ipagawas 48-oras sa dili pa ang gipaabot nga pag-igo niini ilabi na nga mahimo man kining makita o matagna sa dili pa mahitabo.
Ubos sa SSA no. 1, gibanabanang mokabat sa 2-metro ang gitas-on sa storm surge nga masinati sa apektadong lugar.
Hulga sa lima ka metrong gitas-on sa storm surge usab ang nahisulod sa SSA no.2 ug labaw sa lima ka metro ang sa SSA no.3.
Matud pa ni Project NOAH (Nationwide Operational Assessment of Hazards) Executive Director Mahar Lagmay, nakabase ang kalampusan sa bag-ong proyekto sa ahensya sa kooperasyon sa mga komunidad sa ipagawas nilang detalyadong mapa batok sa mga kalamidad.
Apan giingong sa dili pa kini ipatuman, kinahanglan unang tun-an ang mga baybayon sa nasud, butang nga niadto pang Setyembre 2013 nila gisugdan.
Gipaabot nga makumpleto ang mga detalyadong mapa sa mga lugar nga mahimong maigo sa storm surge sa Setyembre o sa dili pa mahuman ang tuig. (PIA7-Bohol/ECB)
by aimee | Feb 3, 2014 | Headlines
MANILA, Feb. 3, 2014 (PIA)–Gipagawas sa World Wide Fund for Nature ug Bank of the Philippine Islands ang listahan sa mga lalawigan nga kuyaw maigo sa kalamidad base sa resulta sa gipahigayon nilang hugot nga pagtuon kalabot sa climate change.
Nag-una sa listahan ang Baguio, Dagupan ug Tacloban sa gitumbok nga grabeng apektado sa mga epekto sa climate change.
Matud pa sa WWF, 12 ka lalawigan ang nahiapil sa mga gikahadlokang grabeng maigo sa kalamidad.
Nahiapil usab niini ang Iloilo, Cagayan de Oro, Cebu, Zamboanga, Naga, Laoag, Davao, Batangas ug Angeles.
Gipasabot ni WWF-Philippines vice chair ug CEO Jose Maria Lorenzo Tan nga tuyo sa ilang organisasyon nga tabangang makapangandam ang mga nahisgotang lalawigan sa pag-abot sa bisan unsang kalamidad. (PIA7-Bohol/ECB)
by aimee | Jan 30, 2014 | Headlines, National News
MANILA, Jan. 30, 2014 (PIA)–Taliwala sa sunod-sunod nga kalamidad nga niigo sa nasud sa niaging tuig, nahimo pa gihapon sa Pilipinas nga makab-ot ang economic growth target niini.
Base sa gipagawas nga taho sa Philippine Statistics Authority (PSA), nakatala og full-year tally ang gross domestic product (GDP) sa 7.2 porsiyento.
Giingong mas taas kini sa growth target nga 6.0 hangtud 7.0 porsiyento lamang sa tuig 2013.
Sa usa ka press conference ganinang buntag, gibutyag ni National Economic and Development Authority (NEDA) Director General Arsenio Balisacan nga nakatala lamang og 6.5 porsiyento nga GDP ang nasud sa ika-upat nga kwarter sa 2013.
Human kini sa pagpanghasi sa Bagyong Yolanda nga maoy nakapahinay sa paglambo sa ekonomiya. Kini ang pinakahinay nga paglambo sa ekonomiya sa nasud sa niaging tuig.
Kahinumdoman nga nikabat sa 7.8% ang GDP niadtong unang kwarter, 7.5% niadtong ikaduhang kwarter ug 7.0% sa ikatulong kwarter.
Apan bisan pa niini, naapil pa gihapon ang nasud sa “best performing economies” sa Asya niadtong ika-upat nga kwarter ug nahimong nag-unang hinungdan sa maong paglambo ang sector sa services ug industry.
Gi-angkon usab ni Balisacan nga madugay pa una padayong makabangon ang mga lugar nga naigo sa Bagyong Yolanda ug giingong gipaabot nga makaapekto pa gihapon kini sa GDP sa unang bahin sa 2014.
Apan gipahayag ni Balisacan nga, “We are optimistic that the Philippine economy will remain strong in 2014.” (PIA7-Bohol/ECB)
by aimee | Jan 29, 2014 | Headlines, National News
MANILA, Jan. 30, 2014 (PIA)–Dili apektado ang mga Pilipinong naggunit og mga pasaporteng berde ug maroon sa desisyon sa Hong Kong nga isuspinder ang 14 ka adlaw nga visa-free arrangement niini sa Pilipinas.
Gitataw sa Philippine Consulate General sa Hong Kong nga dili apektado sa maong polisiya ang mga regular passport holders nga green ug maroon.
Ang apektado sa suspensyon nga magsugod sa Pebrero 5 mao lamang kadtong naggunit sa diplomatic (blue passport) ug official (red passport).
Kagahapon (Enero 29), gipahibalo sa gobyerno sa Hong Kong ang desisyon niining isuspinder ang visa-free arrangement niini sa Pilipinas isip silot human wala nangayo ang gobyerno sa Pilipinas og formal apology kalabot sa nahitabong hostage crisis sa Manila niadtong tuig 2010 diin walo ka Hong Kong tourist ang namatay.
Apan giingong bukas pa gihapon ang gobyerno sa Hong Kong nga ipadayon ang diyalogo tali sa gobyerno sa Pilipinas aron masulban ang maong problema. (PIA7-Bohol/ECB)
FDA, nipasidaan batok sa mga gibaligyang gadgets
nga nagpasalig himuong alkaline o oxygenated ang tap water
MANILA, Jan. 30, 2014 (PIA)–Nipasidaan ang Food and Drugs Administration (FDA) sa publiko batok sa mga gibaligyang gadgets nga nagpasalig nga himuong alkaline o oxygenated water ang mga tap water o tubig gikan sa gripo.
Base sa FDA Advisory 2014-010, dili rehistrado sa ilang buhatan ang maong mga gadgets.
Ang pasidaan gihimo sa FDA human makita sa kamerkadohan ang pipila ka vendo-type outlets ug gadgets nga nagpasalig nga kun ipa-agi dinhi ang tubig gikan sa gripo, mahimo kining alkaline water.
Giingong wala usab kamatuoran nga ang alkaline water adunay health benefits ug makaayo og sakit, epektibong antioxidants ug makapabata kini.
“Although the FDA recognizes the United Nations General Assembly Resolution A/RES/64/292 (2010), which guarantees the right to safe and clean drinking water, therapeutic claims made on drinking water as a ploy to promote and market water must be substantiated through valid clinical trials,” parte pa sa advisory sa FDA.
Gitambagan ni FDA Director Dr. Kenneth Hartigan-Go ang publiko nga dili magpabiktima sa mga namaligya sa maong mga gadgets. (PIA7-Bohol/ECB)
by aimee | Jan 29, 2014 | Headlines
MANILA, Jan. 29, 2014 (PIA)–Bukas ang Malakanyang sa mga sugyot nga sa Freedom of Information (FOI) Bill nga kasamtangang gituki karon sa Kongreso, i-apil usab didto ang amendment nga magmando sa mga opisyal sa gobyerno sa pagbutyag sa ilang kita aron mahibaw-an kun pila ang ilang kita samtang nag-alagad sa gobyerno.
Gisugyot ni Senador Miriam Defensor-Santiago ang usa ka amendment sa FOI Bill nga mag-mando sa tanang opisyal sa gobyerno nga ibutyag ang tanang tinubdan sa ilang mga kita.
Sa usa ka press briefing sa Malakanyang kagahapon, miingon si Kalihim Herminio Coloma Jr. sa Presidential Communications Operations Office (PCOO) nga paaboton sa gobyerno ang desisyon sa mga magbabalaod kalabot sa maong sugyot ug mosunod sila niini.
“Hihintayin namin ang pagpapasiya ng Lupon ng Senado sa Public Information at ng katapat nitong lupon sa Kapulungan ng mga Kinatawan. Hihintayin namin ang bubuuing batas dahil ang pagpapanukala ng batas ay pangunahing tungkulin ng mga mambabatas,” pahayag ni Coloma.
Giingong nagpabilin ang ilang panglantaw sa paghatag og igong oras sa atong mga magbabalaod alang sa paghimo sa mga aspeto sa balaod. (PIA7-Bohol/ECB)
Malakanyang: Tabang sa katawhan, kinahanglan aron masumpo ang krimen
MANILA, Jan. 29, 2014 (PIA)–Ang pagsumpo sa krimen ang nag-unang gihatagan og pagtagad sa gobyerno, apan kinahanglan ang tabang sa katawhan aron mahimong malampuson ang tinguha niini, matud pa ni Kalihim Herminio Coloma, Jr. sa Presidential Communications Operations Office (PCOO).
Giingong ang pagsumpo sa krimen magmalampuson sa tabang sa mga komunidad ug sa katawhan ug dili lamang sa bug-at nga silot.
“Mao nga makasiguro kita nga seryoso ang gobyerno sa pagsumpo sa tanang matang sa krimen ug ang tinguha nato nga makuhaan ug sumpuon kini sa tanang paagi ug sa tanang larangan,” matud pa sa Kalihim sa PCOO.
Kalabot sa pagpabalik sa silot nga kamatayon aron mapitol ang mga naghimo sa mga grabeng krimen, miingon si Coloma nga nag-alangan ang administrasyon sa pagpatuman og balik niini tungod sa problema sa atong justice system ug basin usab maapil pa kadtong mga inosenteng mga akusado tungod lamang sa kapakyas nga makakuha ug maayong abogado.
Giingong angay una tun-an ang mga detalye kalabot niini tungod kay sensitibo kini kaayo. (PIA7-Bohol/ECB)
by aimee | Jan 27, 2014 | Headlines, Local News / Bohol Balita
TAGBILARAN CITY, Bohol, Jan. 27, 2014 (PIA)–Bisan naigo ang lalawigan sa magnitude 7.2 nga linog niadtong Oktubre sa niaging tuig, ang Bohol gi-bisita gihapon sa daghang mga turista.
Ang industriya sa turismo dinhi nakatala og 400,090 ka turista nga nibisita dinhi sa niaging tuig 2013 base sa datus sa Bohol Tourism Office (BTO).
Apan kini posibleng madugangan pa unta kun ang ubang lungsod diin adunay pantalan, sama sa Jagna ug Ubay, malakip sa pagkuha sa mga dumuduong dinhi sa Bohol.
Ang buwan sa Mayo sa niaging tuig ang nakatala sa pinaka-daghang turista nga nikabat sa 50,339, apan ang pinaka-ubos mao ang buwan sa Oktubre nga aduna lamang 15,772 tungod na usab sa linog nga niigo sa Bohol.
Ang ihap sa tourist arrivals nisaka sa 18,355 sa Nobyembre ug 26,475 sa Disyembre sa niaging tuig.
Ang buwan sa Enero nakatala og 29,480; Pebrero – 35,392; Marso – 38,559; Abril – 49,583; Hunyo – 37,153; Hulyo – 34,003; Agosto – 33,676 ug Setyembre – 31,304.
Ang lokal nga turista mao’y dakung bul-og sa mga dumuduong dinhi nga nikabat sa 221,960 diin 146,866 (via air) samtang 75,094 (sea traspo).
Ang mga Asians ang kinadaghanang langyaw nga nibisita dinhi nga adunay 115,928 (via air and sea); gisundan sa Europeans nga nikabat sa 34,097; ug mga Amerikano nga nikabat sa 28,105.
Ang labing taas nga pag-uswag sa turismo sa Bohol nabati sa dihang nabisita kini og 641,614 ka turista niadtong tuig 2012 base sa datos sa BTO. (PIA7-Bohol/ECB)
