by aimee | Dec 16, 2013 | Headlines, National News
MANILA, Dec. 16 (PIA)–Gipasigarbo ni Presidente Benigno ‘Noynoy’ Aquino III sa iyang pag-abot kagahapon gikan nitambong sa 40th ASEAN-Japan commemorative summit ang mga ‘good news’ nga iyang dala.
Gibutyag sa Presidente nga gi-aprubahan na sa Japanese International Cooperation Agency (JICA) ang $184 milyon nga pautang aron makapalit og 10 ka barko ang Philippine Coast Guard (PCG) nga magbantay sa atong kadagatan.
“Bago tayo lumipad pauwi, tuloy pa rin ang pagdating ng good news. Nalagdaan na po ang $184 million na pautang mula sa Japan International Cooperation Agency para makabili ng sampung Coast Guard vessels na magbabantay sa ating mga baybayin,” matud pa sa Presidente sa iyang arrival message sa Ninoy Aquino International Airport Terminal 2 niadtong Domingo.
Gipaabot nga ang maong 10 ka bag-ong multi-role nga barko sa PCG magamit na sa 2015 human ang bidding process niini.
Nagpasalamat usab si Presidente Aquino kang Japanese Prime Minister Shinzo Abe sa tabang niini sa mga biktima sa bagyong Yolanda ilabi na ang pagpadala niini og mga personnel nga mitabang sa search and recovery operations sa Tacloban City. (PIA7-Bohol/ECB)
by aimee | Dec 13, 2013 | Headlines, National News
MANILA, Dec. 13 (PIA)–Dili na kinahanglang mokanaug pa sa puwesto ang 422 elected officials kun matarong nila dayon ang ilang Statement of Contributions and Expenditures (SOCE).
Kini ang gitataw sa tigpamaba sa Commission on Elections (COMELEC) nga si James Jimenez human una nang gimanduan sa poll body kagahapon ang maong mga napiling opisyal nga biyaan ang ilang posisyon kun dili dayon makaduso o matarong ang ilang mga SOCE.
Gitambagan ni Jimenez ang maong mga napiling opisyal nga sundon lang tanan ang kinahanglang himuon sa ilang SOCE sama sa prescribed form, signatory requirements ug uban pa ug bayran ang administrative fines, usa iduso sa ilang buhatan.
“As far as we are concerned, if they can correct naman [their] deficiencies, hindi na nila kailangang bumaba [sa pwesto], ayusin na lamang nila ang kanilang submissions. Sundin lang natin ang… prescribed form, sundin lamang ang signatory [requirements], tapos na ang usapan diyan,” matud pa ni Jimenez.
Gipasabot usab ni Jimenez nga gi tagsa-tagsa na og subay sa poll body ang matag dokumentong giduso sa ilang buhatan ug nadiskubre nilang adunay mga napiling opisyal nga wala pa niduso sa ilang SOCE, ang uban adunay deficiency ang SOCE o di kaha dili personal nga milagda sa ilang SOCE. (PIA7-Bohol/ECB)
Expiry date sa mga gift checks, gi-bawal na
MANILA, Dec. 13 (PIA)–Nagpagawas karon og kamanduan ang Department of Justice (DoJ) aron ibawal ang pagbutang og expiry date sa mga gift certificates.
Ang gipagawas nga kamanduan ni Justice Secretary Leila de Lima agig pagsunod sa Administrative Order No. 10-04 series of 2010 nga nag-bawal sa pag-isyu og mga gift certificates, checks ug cards nga adunay nakabutang nga expiry dates.
Giingong ang gift certificates susama na sa cash nga walay expiration date.
Tungod niini, bawal na sa mga kumpanya ang pagbutang og expiry date sa bisan unsang gift checks ug gift cards samtang nagkaduol na ang pagsaulog sa Pasko ug Bag-ong Tuig.
Una nang nipagawas ang Department of Trade and Indiustry (DTI) og kamanduan nga nagbawal sa mga supplier og gift checks, checks ug cards nga nagtakda og expiry date. (PIA7-Bohol/ECB)
by aimee | Dec 12, 2013 | Headlines, Local News / Bohol Balita
MANILA, Dec. 12 (PIA)–Ang National Housing Authority (NHA) nipagawas na og P388 milyon nga pondo ngadto sa local government units alang sa pagpaayo ug pagpatukod sa mga nangagubang balay sa Bohol.
Kini matud pa ni Bise Presidente Jejomar C. Binay diin iyang gipasabot nga ubos sa Housing Materials Assistance (HOMA), ang NHA mohatag og P10,000 sa matag pamilyang naguba ang balay tungod sa 7.2 magnitude nga linog nga nitay-og sa Bohol niadtong Oktubre 15.
“The government remains committed in helping the earthquake victims rebuild their lives. This is only the start,” matud pa ni Binay.
Gibutyag ni Binay nga ang mga lungsod sa Maribojoc ug Antequera nakadawat na og tseke nga nagkantidad og P33,470,000 ug P31,780,000.
Giingong personal kining gitunol sa Bise Presidente ngadto kang Mayor Leoncio Evasco ug Mayor Jose Mario Pahang sa iyang pagbisita sa Bohol niadtong Nobyembre.
Matud pa nga mahimo na usab makuha ang mga tseke alang sa mga lungsod sa Tubigon, San Isidro, Catigbian, Sagbayan, ug Loon.
Gibutyag sa National Disaster Risk Reduction and Management Council (NDRRMC) nga ang maong linog nakaguba sa 73,002 ka mga balay (14,512 totally damaged ug 58,490 partially damaged) sa Bohol, Cebu, Negros Occidental, Negros Oriental, Iloilo, Siquijor ug Guimaras.
Si Binay una nang nitukod og multi-agency task force nga maoy mitino sa mga panginahanglan sa balay sa mga lumolopyo sa Central Visayas kinsang mga panimalay nangaguba sa linog niadtong Oktubre 15.
Gawas sa shelter agencies ubos sa Housing and Urban Development Coordinating Council (HUDCC), ang Bohol-Cebu housing rehabilitation task force mag-apil usab sa Department of Environment and Natural Resources (DENR), Department of Public Works and Highways (DPWH), Department of Social Welfare and Development (DSWD) ug sa Department of Interior and Local Government (DILG).
Ang HUDCC gilangkoban sa NHA, Home Development Mutual (Pag-IBIG) Fund, Home Guaranty Corporation, Housing and Land Use Regulatory Board, National Home Mortgage Finance Corporation, ug sa Social Housing Finance Corporation. (PIA7-Bohol/ECB,with reports from NHA)
by aimee | Dec 11, 2013 | Headlines
MANILA, Dec. 11 (PIA)–Subling nagpahinomdom ang Department of Labor and Employment (DOLE) sa mga employer sa pribadong kompanya sa paghatag sa 13th month pay sa ilang mga empleyado.
Sa gipagawas nga labor advisory, miingon si Labor Secretary Rosalinda Baldoz nga ang paghatag sa 13th month benefit maoy pag-ila sa mga trabahante nga maoy nag-unang puwersa sa productivity, competitiveness ug profitability sa kompanya.
Agig pagsunod na usab sa Presidential Decree No. 851 ug sa Implementing Rules and Regulations, ang mga employer obligadong mohatag og 13 month pay sa ilang mga trabahante.
Kun ang usa ka empleyado nagtrabaho na sa kumpanya og kinatibuk-ang usa ka tuig, makadawat siya og usa ka buwang suweldo isip 13th month pay.
Kini kinahanglang mahatag sa mga empleyado nga nagtrabaho nga dili mo-ubos sa usa ka buwan sulod sa kinatibuk-ang tuig o sa paghidangat sa Disyembre 24 nga walay gi-piling employment status.
Mahimong ihatag sa mga employers ang katunga sa 13th month benefits sa dili pa ang pagbubukas sa regular school year sa Mayo o Hunyo samtang ang nahabiling katunga ihatag sa dili pa Disyembre 24.
“The 13th month pay must be paid on or before 24 December of every year. This year, the 24th of December falls on a Tuesday, so employers may pay their workers the 13th month benefit on this day, but I urge them to pay earlier to avoid the rush,” matud pa ni Baldoz. (PIA7-Bohol/ECB)
by aimee | Dec 10, 2013 | Headlines, National News
MANILA, Dec. 10 (PIA)–Opisyal nang gitudlo ni Presidente Benigno ‘Noynoy’ Aquino III si kanhi Senador Panfilo Lacson III isip Presidential Assistant for Rehabilitation and Recovery.
Sa gipagawas nga Memorandum Order No. 62, nakalatid didto ang mga katungdanan ni Lacson gamit ang iyang bag-ong posisyon nga adunay cabinet rank ubos sa Office of the President.
Usa sa mahinongdanong katungdanan niini ang mahimong over-all manager ug coordinator sa rehabilitation, recovery ug reconstruction efforts sa government department ug ahensiya sa gobyerno.
Partikular nga pagatutokan ni Lacson ang mga lugar nga naapektuhan sa bagyong Yolanda nga mao ang Samar, Leyte, Negros, Cebu, Bohol, Capiz, Aklan, Antique, Iloilo ug Palawan.
Giingong kinahanglan usab makig-alayon si Lacson sa National Disaster Risk Reduction and Management Council (NDRRMC) ug mga ahensiya sa gobyerno nga miyembro niini ug mopahigayon og konsultasyon sa mga hingtungdang Local Government Units (LGUs) sa aspeto sa plano ug programa alang sa rehabilitasyon, recovery ug development sa mga naapektuhang lugar sa bagyong Yolanda.
Apil na usab niini ang over-all strategic vision ug integrated short-term, medium-term ug long-term programs nga iduso kang Presidente Aquino alang sa iyang pagtugot.
Samtang gitudlo usab ni Presidente Aquino si kanhi Chief Operating Officer sa Eton Property Phil. Inc. nga si Danilo A. Antonio isip Undersecretary ni Lacson.
Tungod niini, ang tanang departamento, ahensiya, apil na ang GOCCs , GFIs ug pribadong sektor gimanduan nga suportaan ug tabangan si Lacson isip bag-ong Presidential Assistant for Rehabilitation and Recovery. (PIA7-Bohol/ECB)
by aimee | Dec 5, 2013 | Headlines, Local News / Bohol Balita
TAGBILARAN CITY, Dec. 05 (PIA)–Dili tinuod ang mikatap nga balita pinaagi sa mga text messages nga ma-unlod ang Bohol kun mokabat na kapin sa 6,000 ang aftershocks human gitay-og sa kusog nga linog ang lalawigan niadtong Oktubre 15.
Apan ang ubang parte sa Bohol, apil na ang syudad sa Tagbilaran, misibog og 55 centimeters paingon sa Cebu.
Kini ang gibutyag ni Philippine Institute of Volcanology and Seismology (PHIVOLCS) Dir. Renato Solidum Jr. atol sa gipahigayong Public Forum on Disasters, Climate Change and Marine Biodiversity nga gipahigayon niadtong Disyembre 4 sa JJ’s Seafood Village, sa syudad sa Tagbilaran.
“Actually, the reason why Bohol is around is because of earthquakes and the faults that move vertically. Why? Because limestones are made up of corals and limestones cover a big part of Bohol,” pasabot ni Solidum.
“Build back better,” pag-aghat ni Solidum sa mga Bol-anon.
Gisugyot sa Phivolcs ang gilay-ong dili mo-ubos sa 5 meters sa matag kilid sa active fault ug likayan ang pagpatukod og mga imprastraktura ibabaw sa active fault trace aron malikayan ang ground rupture hazard.
Sa maong forum, gipasabot sa Director sa Phivolcs nga dili linog ang makapatay apan ang mga mangahagsa nga mga kabalayan o imprastraktura mao nga mahinungdanon gayud nga mosubay sa saktong building standard.
Gipasabot usab sa Philvolcs nga ang mga likido nga nanggawas gikan sa mga liki nga bahin sa lungsod sa Loon gitawag kini nga liquefaction og resulta lamang kini sa linog.
Inay nga mahadlok ug maguol nga maunlod ang isla sa Bohol, gisugyot sa Phivolcs nga kinahanglang magbinantayon gayud ang katawhan sa pagsaka ug paglihok sa yuta sama sa nahitabo sa lungsod sa Maribojoc.
Gitataw usab ni Solidum nga hanap nang molihok pa ang North Bohol Fault, ang hinungdan sa linog niadtong Oktubre 15.
Apan angay magbinantayon gihapon ang katawhan tungod kay aduna pay ubang faults ug bulkan sa ubang dapit sa nasud nga maoy makaingon og linog.
Daghang mga balay, simbahan, tunghaan, tulay ug ubang pampublikong imprastraktura sa Bohol ang nangahugno o nangaguba sa dihang gitay-og sa magnitude 7.2 nga linog ang lalawigan niadtong Oktubre 15. (PIA7-Bohol/ECB)
