by aimee | Dec 5, 2013 | Headlines, Health and Medicine
MANILA, Dec. 05 (PIA)–Gitataw sa Department of Agriculture (DA) nga nagpabiling bird flu-free ang Pilipinas sukwahi sa kahadlok sa pipila ka mga Pinoy sa H7N9 bird flu nga natala ning bag-o lang sa Hong Kong.
Gibutyag ni Assistant Director Simeon Amurao sa Bureau of Animal Industry nga 12 ka tuig nang bird flu virus-free ang Pilipinas.
Giingong sukad niadtong 2001, gidili na ang pagpasulod og mga manok gikan sa mga nasud sa China ug Hong Kong.
Matud pa nga gibantayan usab sa ahensya ang mga migratory birds nga posibleng magdala og virus.
Samtang matud pa sa tigpamaba sa Department of Health (DOH) nga si Dr.EricTayag, walay natalang kaso nga H7N9 bird flu sa nasud ug walay travel ban sa Hong Kong ug China.
Nipahinomdom ang ahensya nga kanunay manghunaw og kamot ug tabunan ang baba kun mo-ubo aron malikayan ang sakit.
Gitambagan usab ang mga poultry farmer nga ipahibalo dayon sa mga otoridad kun magkadaghan ang mamatay nilang binuhing manok aron mapugngan ang posibleng pagkatap sa virus.
Kahinomduman nga usa ka 36-anyos nga Indonesian domestic helper nga naggikan sa Shenzen, China ang mipalit, mi-ihaw ug mi-kaon sa manok ug kritikal karon ang kondisyon tungod sa maong bird flu virus. (PIA-Bohol/ecb)
by aimee | Nov 29, 2013 | Headlines, National News
TAGBILARAN CITY, Nov. 29 (PIA)–Gimando karon ni Presidente Benigno “Noynoy” Aquino III sa tanang mga government financial institutions (GFIs) ang pagpatuman sa unom ka buwang moratorium sa paningil og loan payments ug paghatag og interest-free loans sa mga residente o negosyanteng direktang naigo sa bagyong “Yolanda”.
Nahisulod kini sa Memorandum Circular No. 59 nga gilagdaan sa Presidente niadtong Nobyembre 26 nga gipagawas na karon sa Malakanyang.
Apil niining kamanduan ang Land Bank of the Philippines (LBP), Development Bank of the Philippines (DBP), Government Service Insurance System (GSIS), Social Security System (SSS), National Home Mortgage Finance Corporation-PAGIBIG, People’s Credit and Finance Corporation, Philippine Postal Savings Bank, Philippine Retirement Authority, Quedan Rural Credit and Guaranty Corporation ug United Coconut Planters Bank.
Tuyo niining matabangan ang mga biktima nga makuhaan ang ilang problema ug makabawi sa gidangatan nga trahedya. (PIA7-Bohol/ECB)
by aimee | Nov 29, 2013 | Headlines, National News
TAGBILARAN CITY, Nov. 29 (PIA)–Giseguro ni Presidente Benigno “Noynoy” Aquino III nga lig-on ang mga inprastrakturang ipatukod dungan sa pasalig nga subling ipatindog ang mga naguba o nahugnong mga inprastraktura tungod sa linog nga nitay-og sa lalawigan niadtong Oktubre 15.
“Rebuild all that needs to be rebuilt but in a much better condition so they would be able to withstand natural calamities, ” matud pa ni PNoy atol sa gipahigayong media interaction kagahapon nga gipahigayon sa Bohol Tropics Resort ning syudad sa Tagbilaran.
Matud pa ni PNoy nga ang duha ka tulay nga gihimo karon sa Bohol kasamtangan lamang human kini nahugno tungod sa magnitude-7.2 nga linog sa niaging buwan.
“Temporary bridges were being inaugurated today. Bakit temporary? Kasi maraming tests na kailangang gawin pa. Tests to make sure na ito ba ay ang best site,” pasabot ni PNoy.
Gipasalig pa ni PNoy nga mahuman ang permanenteng Abatan bridge sa Setyembre 2016.
Samtang gitahasan sa Presidente ang Department of Health (DoH) sa pagtukod og bag-ong district hospital sa Loon, human nahugno usab sa linog ang Congressman Castillo Memorial Hospital sa maong lungsod.
“Pati hospitals… I tasked DOH to make sure that program to build a new one, perhaps in a different location,” pagbutyag sa Presidente.
Ang National Housing Authority (NHA) ug Department of Social Welfare and Development (DSWD) usab ang giingong mamahala sa mga residente nga wala pay mapuy-an human sa bagyong “Yolanda.”
Samtang masaligon ang Presidente nga mabalik na sa ubang lugar sa Visayas region ang suplay sa kuryente sa Disyembre.
Gipasalig sa Presidenteo nga adunay igong pondo nga gigahin ang gobyerno alang sa rehabilitasyon sa mga lugar nga naigo sa niaging mga kalamidad. (PIA7-Bohol/ECB)
by aimee | Nov 18, 2013 | Headlines, National News
MANILA, Nov. 18 (PIA)–Usa ka basic communication system nga dili na mag-agad pa sa
external power sources o sa celluar network ang gi-andam na karon sa gobyerno.
Gimanduan na ni Presidente Benigno ‘Noynoy’ Aquino III ang Department of Science and
Technology (DOST) nga mangandam na og plano alang nining maong sistema.
“Sinabi ko na sa DOST na maghanda ng sistema ng komunikasyon na hindi umaasa lamang
sa external power sources o dili kaya ay sa cellular networks lamang. Ito ay sa isang bagay
na maaasahan natin 24/7 ano man ang kalagayan ng panahon” matud pa sa Presidente.
Ang pagkawala sa kuryente ug komunikasyon tungod sa labing kusog nga bagyong Yolanda
ang nahimong babag sa paghatud og tabang ug serbisyo sa daghang lugar nga naapektuhan
sa bagyo.
Matud pa sa Presidente nga gipaningkamotan sa kagamhanan nga mabutang og maayo ang
katakos niining atubangon ang mga kalamidad.
Giingong gipaningkamotan na usab og maayo sa gobyerno ang tanang proseso nga
mahimong paspas ug epektibo ang pagtubag ug paghatag og tabang. (PIA7-Bohol/ECB)
by aimee | Nov 5, 2013 | Headlines, National News
MANILA, Nov. 05 (PIA)–Gi-alerto na sa Malakanyang ang National Disaster Risk Reduction and Management Council (NDRRMC) kalabot sa nagsingabot nga bagyong ‘Yolanda’ sa nasud.
Una nang gipahibalo sa PAGASA nga moigo ang giingong “super typhoon” sa dakung parte sa Visayas ug Luzon lakip na sa Manila sa Huwebes.
Matud pa ni Presidential Communication Operations Office (PCOO) Secretary Sonny Coloma, partikular nga gipatutokan ni Presidente Benigno “Noynoy” Aquino III ang kaluwasan sa katawhan.
Dugang pa ni Coloma, naka-preposition na ang mga relief goods sa Department of Social Welfare and Development (DSWD).
Samtang activated na usab ang mga PDRRMC ug subling giseguro sa Malakanyang nga igo ang pondo sa gobyerno aron mahatagan og tabang ang mga maapektuhan sa bagyo.
Padayon usab ang pasidaan sa PAGASA kalabot sa nagsingabot nga bagyong ‘Yolanda’ samtang nagkaduol na kini sa Philippine area of responsibility.
Kalabot niini, gisaka na sa NDRRMC sa blue alert status ang tanang buhatan sa Office of the Civil Defense (OCD) sa mga dapit sa nasud nga posibleng maigo sa bagyo.
Matud pa ni NDRRMC spokesperson Maj. Rey Balido, ang mga rehiyon nga gipaubos sa blue alert mao ang Northern Mindanao, Caraga, Regions 8, 7, 5, 4-A, 4-B ug Metro Manila.
Dugang pa ni Balido, nakaalerto na usab ang tanang mga disaster units sa Armed Forces of the Philippine (AFP). (ECB/PIA7-Bohol)
by aimee | Nov 5, 2013 | Headlines
MANILA, Nov. 05 (PIA)–Molibot si Presidente Benigno “Noynoy” Aquino III sa mga lalawigan aron ipasabot ang paggamit sa gobyerno sa Disbursement Acceleration Program (DAP).
Matud pa ni Presidential Communication Operations Office (PCOO) Secretary Sonny Coloma, andam nga makigpulong ang Presidente aron masabtan sa katawhan ang kamahinungdanon sa paggamit sa DAP.
Giingong mahimong parte na sa provincial sorties sa Presidente ang pagpasabot sa DAP ug dili kini himuon tungod lamang sa pagtuo sa mga kritiko nga naapektuhan na ang administrasyon sa gi-kwestyong paggamit sa nahisgotang pondo nga naggikan sa savings sa gobyerno.
Matud pa nga pinaagi usab niini, masabtan sa katawhan ang mga butang nga adunay epekto sa paggamit sa gobyerno sa DAP ug sa kaugmaon sa nasud.
Dugang pa ni Coloma, andam usab ang Presidente nga makig-tinabangay ang Palasyo sa Kongreso aron tubagon ang nagkakusog nga panawagan sa katawhan sa saktong paggamit sa pondo sa gobyerno. (ECB/PIA7-Bohol)
