by aimee | Apr 18, 2013 | Headlines
TAGBILARAN CITY, Bohol, April 18 (PIA)–Nipasidaan ang Philippine Pharmacists Association (PPHA), Inc. batok sa mga botikang walay pharmacist.
Matud pa ni PPHA Executive Director Yolanda Robles, kinahanglang may pharmacist ang matag botika, gamay o daku man kini.
Nakalapas sa balaod ang mga botikang walay pharmacist tungod kay requirement man sa Food and Drug Administration (FDA) ang pagbaton og pharmacist sa mga botika.
Giingong kadaghanan sa mga botika karon adunay sertipikasyon sa usa ka pharmacist apan kasagaran wala man kini sa botika aron mo-tambag sa mga mopalit ug adunay sakit nga mopalit og tambal.
Gawas niini, miingon usab si Robles nga delikado usab ang botikang walay pharmacist tungod kay mabaligya lamang ang ubang tambal nga susama lamang sa kendi.
Gitin-aw usab ni Robles nga ang natahong 70% sa mga botika nga walay pharmacist base lamang sa usa ka lugar.
Mao nga may proyekto karon ang PPHA aron susihon ang mga botika sa tibuok nasud kun may pharmacist ba kini.
Gi-aghat usab niini ang FDA sa hingpit nga monitoring sa mga botika. (PIA-Bohol/ecb/i-hd)
Sa mga accredited freight forwarders lamang magpadala – DTI
TAGBILARAN CITY, Bohol, April 18 (PIA)–Gitambagan sa Department of Trade and Industry (DTI) ang mga negosyante ug overseas Filipino worker (OFW) nga makig-transaksyon lamang sa mga accredited freight forwarder sa Philippine Shippers’ Bureau sa pagpadala sa ilang mga packages.
Taliwala kini sa kapin 153 nga natalang reklamo sa DTI batok sa mga freight forwarder nga pakyas sa pagpadala sa mga balikbayan boxes sa ilang mga kliyente.
Matud pa ni DTI Undersecretary for Consumer Welfare and Business Regulation Zenaida Maglaya, kasaligan ug mosunod gayud sa standard sa gobyerno ang mga freight forwarder nga accredited nila.
Gitambagan usab ni Maglaya ang publiko nga susihon sa website sa DTI nga www.dti.gov.ph ang listahan sa mga accredited freight forwarding companies aron makasalig ug makasiguro og maayong serbisyo.
Mahimong motawag sa DTI direct hotline (02) 751-33-30 o mag-email sa dti_psb@yahoo.com.ph alang sa dugang mga pangutana ug kasayuran. (PIA-Bohol/ecb/g-gg)
by aimee | Apr 17, 2013 | Headlines
TAGBILARAN CITY, Bohol, April 17 (PIA)–Nimugna ang Department of Education (DepEd) og election task force nga mosuporta sa mga magtutudlo nga mo-alagad isip mga miyembro sa board of election inspectors sa umaabot Mayo 13 midterm elections.
Gitudlo ni DepEd Sec. Armin Luistro nga mamuno sa election task force si Undersecretary for Legal Affairs Atty. Alberto Muyot.
Katoyuan niining election task force nga mahatagan og igong impormasyon ang mga magtutudlo, apil na usab sa mga technical ug legal assistance kun may atubangon nga problema sa piniliay.
Bisan ang mga principals, supervisors, schools divisions ug city superintendents ug uban pang DepEd employees nga mo-alagad sa eleksyon, apil usab sa proteksyon sa maong task force.
Pagabuksan ang operation center sa election task force sa Bulwagan ng Karunungan sa DepEd Central Office sa Pasig City gikan ala-1:00 sa hapon sa Mayo 12 hangtud udto sa Mayo 14.
Samtang gipahinomduman ni Luistro ang mga DepEd personnel nga magpabilin nga non-partisan ug dili mosalmot sa election campaign o sa bisan unsang kalihokang politikal gawas lamang sa pagbotar. (PIA-Bohol/ecb/i-hd)
by aimee | Apr 17, 2013 | Headlines, National News
TAGBILARAN CITY, Bohol, April 17 (PIA)–Todo alerto karon ang Philippine National Police (PNP) ug Armed Forces of the Philippines (AFP) human sa nahitabong pag-atake sa mga gidudahang terorista sa marathon sa Boston, Massachusetts sa Estados Unidos niadtong Lunes diin tulo ang namatay samtang naa sa 144 pa ang naangol.
Matud pa ni PNP Spokesman Chief Supt. Generoso Cerbo Jr., bisan sa kasamtangan nga wala may namonitor nga ‘terror attack’ sa Pilipinas, padayon ang monitoring ug intelligence operations sa PNP batok sa mga teroristang grupo aron masiguro ang seguridad sa publiko.
Si Cerbo nagkanayon nga mas maayo nga andam sila sa tanang oras aron dili malutsan sa mga terorista.
Sa panig usab sa AFP, miingon si Public Affairs Office Chief Col. Arnulfo Marcelo Burgos Jr. nga gihingosgan na usab sa ilang security forces ang seguridad ug intelligence monitoring ilabi na sa mga lugar nga gi-taguan sa mga teroristang grupo.
Apil sa hugot nga gi-monitor ang Abu Sayyaf Group, New People’s Army ug ang Jemaah Islamiyah (JI) nga nagtago sa rehiyon sa Mindanao. (PIA-Bohol/ecb/i-sjp)
DFA, miseguro nga walay Pinoy casualty sa linog sa Iran
TAGBILARAN CITY, Bohol, April 17 (PIA)–Giseguro sa Department of Foreign Affairs (DFA) nga walay Pinoy nga naangol o namatay sa kusog nga linog nga mi-igo sa Iran kagahapon.
Matud pa ni DFA Spokesperson Raul Hernandez, luwas ang halos 1,000 ka Pinoy nga nagtrabaho didto base na usab sa taho sa Embahada sa Pilipinas.
Giingong luwas usab ang mga Pinoy nga naa sa United Arab Emirates (UAE) diin nakabati usab sila sa magnitude 7.8 nga linog.
Nanghinaot si Hernandez nga magpadayon ang maayong balita samtang gipaabot pa nila ang mosunod pang reports sa mga foreign posts sa apektadong nasud.
Sa pagkakaron, naa sa 40 na ang natalang namatay samtang daghan ang nanga-angol sa maong linog. (PIA-Bohol/ecb/i-gg)
by aimee | Apr 16, 2013 | Headlines, National News
TAGBILARAN CITY, Bohol, April 16 (PIA)–Walay Pinoy nga nadamay sa pag-bomba nga nahitabo sa Boston Marathon sa Massachussets diin tulo ang namatay ug kapin 100 ang na-angol.
Base kini sa pahayag sa embahada sa Pilipinas sa Washington DC nga nagkanayong “No Filipino casualties reported in the Boston Marathon blasts but still checking to make sure all Filipinos in area are accounted for.”
“So far wala po tayong reported na Filipino casualties sa mga pag-bomba sa Boston Marathon,” pagsiguro ug pagkumpirmar usab ni Department of Foreign Affairs (DFA) spokesperson Asec Raul Hernandez.
Samtang personal nga gipa-abot ni Presidente Benigno “Noynoy” Aquino III ang iyang pahasubo sa mga pamilya sa mga biktima sa pag-bomba sa Boston Marathon sa Massachusets.
Sa pahayag ni Deputy Presidential spokesperson Abigail Valte, miingon kini nga nakighiusa ang nasud sa international community sa pagpa-abot sa simpatya sa mga biktima.
“The President personally conveys a message of deep sympathy, concern, and solidarity with the people of Boston, where he and his family had found refuge during martial law, and which so many Filipinos call home,” base pa sa pahayag sa Malakanyang.
Gipadayag usab sa gobyerno ang hingpit nga pagkondena niini sa insidente, (PIA-Bohol/ecb/i-gg)
Airtime limit sa pol ads, gipugngan sa SC
TAGBILARAN CITY, Bohol, April 16 (PIA)–Kasamtangang gipugngan ang gipatuman nga limitadong airtime alang sa political advertisements sa mga kandidato base sa gipagawas nga status quo ante-order (SQA) sa Korte Suprema karong adlawa.
Kini human sa gipahigayong en banc session sa mga mahistrado sa SC sa Baguio City diin migawas sa botohan ang 9-6 nga resulta aron ibasura ang gipatuman nga patakaran sa Commission on Elections (Comelec) karong 2013 midterm elections.
Kahinumdoman nga sa Comelec Resolution Number 9615, gihatagan lamang og 120 minuto nga airtime limit sa telebisyon alang sa political advertisements ang mga national candidate ug 180 minuto usab sa radyo.
Alang sa mga lokal nga kandidato, gihatagan lamang sila og 60 minuto sa telebisyon ug 90 minuto sa radyo.
Ang resolusyong gipagawas sa Korte Suprema agig tubag sa gidusong petisyon sa pila ka TV network nga mikuwestiyon sa gipatuman nga airtime limit sa Comelec. (PIA-Bohol/ecb/i-gg)
by aimee | Apr 15, 2013 | Headlines
TAGBILARAN CITY, Bohol, April 15 (PIA)–Gipasalig sa gobyerno sa Pilipinas sa Moro Islamic Liberation Front (MILF) nga gihimo na niini ang tanan aron mahuman sa labing daling panahon ang peace agreement.
Kini human nipahayag og pagkadismaya ang MILF sa kapakyas sa duha ka panig nga mahuman ang bisan usa sa tulo ka “annexes” sa gimugnang Bangsamoro Framework Agreement.
Sa parte sa Malakanyang, miingon si deputy presidential spokesperson Abigail Valte nga padayon ang ilang trabaho aron maplansta ang tanang mga isyung nahisulod sa dokumento.
“Lahat na panig patuloy ang pagtrabaho para pag-usapan at ma-discuss ang lahat na issues na involved sa natitirang annexes,” pasabot ni Valte.
Kahinumdoman nga una nang naglaum si MILF peace panel chairman Mohager Iqbal nga malagdaan na ang nahabiling annexes sa dili pa ang piniliay.
Pagkahuman na sa umaabot nga piniliay sa Mayo 13 mobalik ang duha ka panig sa negotiating table. (PIA-Bohol/ecb/i-sjp)
Comelec, gitun-an ang online voting alang sa OAV
TAGBILARAN CITY, Bohol, April 15 (PIA)–Gitun-an karon sa Commission on Elections (Comelec) kun unsaon pagsaka sa turnout sa overseas absentee voting (OAV) nga nagpadayon karon sa nagkalin-laing dapit sa kalibotan.
Matud pa ni Comelec Chairman Sixto Brillantes, usa sa nakita nilang makapa-aghat sa mga overseas Filipino workers nga mobotar ug mapasaka ang turnout sa OAV ang pagpatuman sa online voting.
Si Brillantes nagkanayon nga basin sa 2016 presidential elections na mapatuman ang online voting tungod kay nagsugod na ang pagbotar karon sa gawas sa nasud.
Didto si Brillantes sa Hong Kong ug gi-atubang ang Filipino community dungan sa overseas absentee voting diin sa kapin 100,000 ka rehistradong botante sa Hong Kong, 536 lamang ang mibotar sa unang adlaw sa piniliay.
Sa pagkakaron, mga naandang problema lamang ang natala sa Comelec sa unang mga adlaw sa absentee voting sama sa mga nangawalang pangalan sa mga botante ug ang wala pagbasa sa PCOS machines sa balota tungod sa sayop nga pag-fill up niini.
Ang overseas ansentee voting nagsugod niadtong Abril 13 ug hangtud kini sa adlaw mismo sa piniliay sa Pilipinas sa Mayo 13. (PIA-Bohol/ecb/i-gg)
by aimee | Apr 11, 2013 | Headlines
TAGBILARAN CITY, Bohol, April 11 (PIA)–Milagda og kasabotan ang Commission on Elections (Comelec) ug ang Department of Education (DepEd) alang sa dawatong insurance, kompensasyon ug assistance sa mga magtutudlo nga motabang isip board of election inspectors (BEIs).
Mismong si Comelec Chairman Sixto Brillantes pa ang nanguna sa maong aktibidad, kauban ang mga opisyal sa DepEd.
Katuyoan niining masiguro ang tabang sa mga magtutudlo kun adunay mahitabong insidente nga wala damha o kaha mga kaso kun may mga election protest nga atubangon.
Gisiguro ni Brillantes nga dili nila pasagdan ang mga magtutudlo nga may daku na usab nga responsibilidad sa umaabot nga piniliay.
Ubos sa maong kasabotan, makadawat ang mga magtutudlo og P3,000 honorarium pinaagi sa ilang ATM payroll accounts.
Gawas niini, milagda usab og kasabotan ang poll body sa Armed Forces of the Philippines (AFP) ug Philippine National Police (PNP) alang sa pagpatunhay sa kahapsay ug kalinaw sa mga lugar diin ipahigayon ang piniliay.
Bisan ang Integrated Bar of the Philippines (IBP), nihatag usab og kasiguradohan alang sa libreng legal aid sa mga magtutudlong ma-angin sa kaso kun may mga mogawas nga isyu sa eleksyon. (PIA-Bohol/ecb/i-hd)
Resulta sa eleksiyon, mahibaw-an dayon sulod sa 48 oras – Comelec
TAGBILARAN CITY, Bohol, April 11 (PIA)–Giingong mahibaw-an sulod lamang sa duha ka adlaw ang resulta sa ikaduhang nationwide automated elections karong 2013 midterm polls.
Kini ang gibutyag ni Comelec Chairman Sixto Brillantes human sa ilang mga gihimong pagpangandam alang sa maong piniliay.
Alang kang Brillantes, kun nakitang dili na igo ang gidaghanon sa botong wala pa naihap ug na-canvass aron pildihon ang mga nag-una nga kandidato, mapadayag na ang mga nidaug.
Apan giingong sibo lamang kini nga sitwasyon alang sa national level o mga nidagang kandidato sa pagka-senador ug partylist organizations.
Samtang sa local level usab, posibleng mas sayo pang mahibaw-an ang resulta sa eleksyon ilabi na sa mga lugar nga gamay lamang ang rehistradong botante. (PIA-Bohol/ecb/i-gg)
