by aimee | Mar 11, 2014 | Headlines, Health and Medicine
MANILA, Mar. 11 (PIA)–Nipasidaan ang Department of Health (DoH) sa publiko batok sa mga sakit nga mahimong makuha sa panahon sa ting-init.
Matud pa sa DoH, kasagaran mokatap karon ang sip-on ug ubo tungod sa pagbag-o bag-o sa panahon.
Giingong angay magpabakuna batok sa flu aron dili dayon taptan og sakit.
Apil na usab ang pagsuka tungod sa mga kontaminadong pagkaon.
Angay usab bantayan ang mga pagkaon nga ginadala sa mga picnic matag summer tungod kay dali kining mapan-os nga mahimong makaingon sa pagpanakit sa tiyan.
Gitambagan sa DoH ang publiko nga amping gayud ilabi na ang mga namaligya aron masiguro nga hinlo ug luwas ang mga pagkaong gibaligya. (PIA7-Bohol/ECB)
by aimee | Feb 26, 2014 | Headlines, Health and Medicine
MANILA, Feb. 26 (PIA)–Gihimakak sa Department of Health (DOH) ang mga balita nga adunay nikatap nga “flesh-eating” skin disease sa Pangasinan.
Matud pa ni Health Secretary Enrique Ona nga walay rason aron mag-panic tungod kay dili tinuod ang maong balita.
“There is no reported case of ‘flesh-eating’ skin disease in the country yet. Absolutely no reason for the public to panic,” matud pa ni Ona.
Gitumbok ni Ona ang duha ka kaso sa mga biktimang adunay sakit sa panit nga nasaypang flesh-eating disease.
Gitataw sa DOH nga ang hinungdan sa multi-drug therapy mao ang sangla nga nakuha sa 21-anyos nga babae sa Sta. Barbara, Pangasinan.
Matud pa nga natambalan na ang maong biktima ug kasamtangan na kining nagpaayo..
Giingong adunay sakit nga severe psoriasis usab ang usa pa ka biktima nga gikan sa Villasis, Pangasinan, (PIA7-Bohol/ECB)
by aimee | Feb 21, 2014 | Headlines, Health and Medicine
MANILA, Feb. 21 (PIA)–Nipasidaan karon ang Food and Drug Administration (FDA) sa publiko kalabot sa mga dili rehistradong mga slimming pills nga adunay makadaot nga mga kemikal nga makaapekto sa kahimsog sa panglawas.
Sa gipagawas nga FDA Advisory 2014-011, pipila sa mga slimming pills nga dili rehistrado ang adunay amphetamine ug sibutramine nga makadaot sa lawas.
Matud pa ni FDA Director General Kenneth Hartigan-Go, ang produktong fat burner HCA 500 milligram capsules adunay amphetamine ug sibutramine nga makaingon sa pagpaspas sa pagpitik sa kasingkasing, confusion, urine retention, painful urination, hyperthermia, muscle pain ug comatose.
Dugang pa ni Go, hinimo sa America Bysilver Pharmaceutical Company Limited ang maong produkto nga dili rehistrado sa FDA aron ibaligya sa nasud.
Subling gitambagan sa FDA ang mga gustong magpa-niwang nga mokunsulta una sa doktor sa dili pa mosulay pag-inom sa mga slimming pills o bisan unsang matang sa anti-obesity drugs.
Niining Enero lamang, may mga slimming products nga nagpositibo sa maong duha ka kemikal ug steroids. (PIA7-Bohol/ECB)
by aimee | Jan 10, 2014 | Headlines, Health and Medicine
MANILA, Jan. 10, 2014 (PIA)–Nipasidaan ang Department of Health sa posibleng pagkatap sa makatakod nga sakit nga tigdas.
Matud pa ni Health Assistant Secretary Eric Tayag, kasagarang mokatap ang sakit nga tigdas kun bugnaw ang panahon mao nga niadtong Nobyembre pa sa niaging tuig, nihatag na og pasidaan ang DOH nga mosaka ang gidaghanon sa mataptan niini tungod kay kining mga sakita man ang manggawas sa panahon sa tingtugnaw ug mohangtud pa gayud sa panahon sa ting-init.
Giingong dali usab kining makatakod sa mga batang walay bakuna batok sa tigdas.
Pasabot pa ni Tayag, kun ang usa ka bata adunay tigdas, 90% sa mga kauban niini sa balay o sa usa ka lugar matakdan usab og tigdas kun wala sila nabakunahi.
Gibutyag ni Tayag ang mga sintomas sa tigdas nga gitawag sa DOH nga 3 C’s:
1.) Conjunctivitis o pagpamula sa mata nga murag adunay sore eyes; 2.) Coryza o medical term alang sa runny nose o sip-on; 3.) Cough o ubo.
Sundan kini og upat ka adlaw nga hilanat ug adunay manggawas nga mga rashes nga molanat taman sa usa ka semana.
Ang maong mga rashes nga pagpamula sa nawong nga murag allergy ug mokatap sa tibuok lawas. Katol kini kaayo mao nga kasagarang pagakawton gayud sa mga bata.
Nihatag usab si Tayag sa mga angay buhaton aron makalikay sa tigdas sama sa alang sa mga masuso hangtud sa edad nga 5-ka tuig, maayong kuhaan dayon kini sa temperatura. Posibleng moabot hangtud 40 ang temperatura sa masuso o bata ug mahimo kining magkumbolsyon mao nga paimnon gayud dayon og paracetamol kun gihilantan.
Kun adunay sip-on ang masuso, mahimong supsupon o mogamit og tumoy sa limpyong panapton ug isulod sa ilong usa kuhaon aron makuha ang nagbarang sip-on tungod kay mahimong magka-kumplikasyon kini sa bronchopneumonia.
May mga bata usab nga magkalibanga ug manglawom ang mga mata nga nagpasabot nga may dehydration na kini mao nga angay dalhon na sa tambalanan.
Giingong mas maayong mahatagan og Vitamin A ang mga bata aron sa pagpalagsik sa resistensya niini.
Angay usab nga mapabakunahan ang mga batang 9 ka buwan, sa dili pa mag-usa ka tuig Angay sugdan na kini dayon ug balikon human sa 12-18 ka buwan ang ika-duhang bakuna.
Gitataw ni Tayag nga walay bayad ang pagpabakuna sa mga health centers tungod kay gibayran na kini sa DOH ug gihatag na sa mga lokal nga pangagamhanan. (PIA7-Bohol/ECB)
by aimee | Dec 5, 2013 | Headlines, Health and Medicine
MANILA, Dec. 05 (PIA)–Gitataw sa Department of Agriculture (DA) nga nagpabiling bird flu-free ang Pilipinas sukwahi sa kahadlok sa pipila ka mga Pinoy sa H7N9 bird flu nga natala ning bag-o lang sa Hong Kong.
Gibutyag ni Assistant Director Simeon Amurao sa Bureau of Animal Industry nga 12 ka tuig nang bird flu virus-free ang Pilipinas.
Giingong sukad niadtong 2001, gidili na ang pagpasulod og mga manok gikan sa mga nasud sa China ug Hong Kong.
Matud pa nga gibantayan usab sa ahensya ang mga migratory birds nga posibleng magdala og virus.
Samtang matud pa sa tigpamaba sa Department of Health (DOH) nga si Dr.EricTayag, walay natalang kaso nga H7N9 bird flu sa nasud ug walay travel ban sa Hong Kong ug China.
Nipahinomdom ang ahensya nga kanunay manghunaw og kamot ug tabunan ang baba kun mo-ubo aron malikayan ang sakit.
Gitambagan usab ang mga poultry farmer nga ipahibalo dayon sa mga otoridad kun magkadaghan ang mamatay nilang binuhing manok aron mapugngan ang posibleng pagkatap sa virus.
Kahinomduman nga usa ka 36-anyos nga Indonesian domestic helper nga naggikan sa Shenzen, China ang mipalit, mi-ihaw ug mi-kaon sa manok ug kritikal karon ang kondisyon tungod sa maong bird flu virus. (PIA-Bohol/ecb)
by aimee | Sep 23, 2013 | Headlines, Health and Medicine
TAGBILARAN CITY, Bohol, Sept. 23 (PIA)–Nihatag og pasidaan sa publiko ang Food and Drug Administration (FDA) batok sa pag-inom sa powder juice drink nga Green Barley nga gipaila isip ‘total food, powder juice’ nga makaayo sa nagkalain-laing sakit.
“The product is sold at around P275 to 300 per bottle, both in the market and in online shops. It is sold in plastic bottles, and the product is in powder form. Green Barley is making false health and therapeutic claims as shown in its advertisement, both in print and digital media,” matud pa ni FDA head Kenneth Hartigan-Go sa FDA Advisory 2013-037 nga gi-petsahan og Setyembre 20.
Dungan niini, gimanduan sa FDA ang ilang mga field officers nga kumpiskahon ang mga naka-ban nga produkto ug mga wala nakarehistrong food supplements nga gibaligya sa merkado.
Sa gipagawas nga advisory, ang maong produkto sa Health Wealth International Corporation nga gimanipaktura sa Global Partners, Inc. giingong wala na nakarehistro sa FDA tungod kay ni-expire na kini niadto pang 2009.
Gitumbok pa sa FDA nga ang maong produkto adunay “therapeutic claims” batok sa nagkalian-laing sakit apil na ang dengue, cancer, diabetes, leptospirosis, high blood pressure, high blood sugar, high cholesterol, arthritis, rheumatism, gout, rhinitis, impotence, goiter, arterial venous malformation, pre-menstrual tension, menopausal complaints, kanunay nga pag-ihi ug myoma.
“As an unregistered health product, Green Barley also has unapproved health claims that it heals wounds and treat skin diseases like fungal infections by topically applying the powder juice on the skin,” dugang pa sa FDA. (PIA-Bohol/ecb)
