by aimee | Apr 2, 2014 | Local News / Bohol Balita, National News
MANILA, April 01, 2014 (PIA)–Subling nipahinomdom ang Commission on Elections (Comelec) nga adunay nahabiling 36 ka adlaw na lamang alang sa tanang bag-ong botante aron makaparehisto alang sa nagsingabot nga national elections sa 2016.
Matud pa sa tigpamaba sa Comelec nga si James Jimenez, Mayo 6 ang gitakdang katapusang adlaw sa pagparehistro sa mga bag-ong botante nga may edad 18 pataas ug sa mga wala pay biometrics.
“Registered voters without biometrics, new voters aged 18 and up; and everyone wanting to update their voter records, 36 days na lang, May 6 na! Registration for Filipino overseas voting also begins on May 6, 2014,” matud pa sa twitter account ni Jimenez.
Giingong mokabat sa walo ka milyong botante ang wala pa nipaubos sa biometrics apil na ang 2 ka milyong bag-ong botante mao nga nanawagan ang poll body nga moadto na sa pinakaduol nga buhatan sa Comelec aron ipatarong ang record sa usa ka botante. (PIA7-Bohol/ECB)
by aimee | Mar 26, 2014 | Local News / Bohol Balita
TAGBILARAN CITY, Bohol, Mar. 26, 2014 (PIA)–Gitunol ni Agriculture Secretary Proceso Alcala sa iyang pagbisita dinhi sa lalawigan niadtong Sabado, Marso 22 ang kapin sa P90-milyong kantidad sa mga agriculture projects ug farm implements ngadto sa mga mayor, mag-uuma ug mangingisda.
Ang maong assistance package parte sa Department of Agriculture’s (DA) rehabilitation assistance sa lalawigan sa Bohol nga grabeng naapektuhan sa pagtay-og sa 7.2-magnitude nga linog niadtong Oktubre 15 sa niaging tuig.
Sa paningkamot sa paghiuli sa mga nangagubang seaweed farms ug aquaculture projects, si Alcala nihatag sa kinatibuk-ang P32 milyon alang sa recovery efforts sa nagkalain-laing proyekto sa pangisda.
Nigahin usab ang DA og P5 milyon alang sa construction sa farm-to-market road sa Cogon Norte.
Nisaad usab si Alcala nga mohatag og galingan sa mais sa mosunod nga upat ka buwan kun magtanom og dugang mais ang mga mag-uuma.
Dugang niini, misaad usab ang kalihim sa DA sa paghatag og tractor alang sa mga tigtanom og mais kun ilang mapalapdan ang pananom sa mais ngadto sa di mo-ubos sa 500 ektarya.
Atol usab sa maong pagduaw sa lalawigan ni Alcala, gilagdaan nila ni Gob. Edgardo Chatto ang Memorandum of Agreement nga nagmugna sa pagpatuman sa Philippine Rural Development Program sa lalawigan sa Bohol.
Ang PRDP unom ka tuig nga programa nga gimugna aron pag-establisar sa inclusive ug market oriented agri-fishery nga sektor pinaagi sa strategic investments.
“You will be able to speed up agriculture-related projects in your locality with the PRDP, with only 10% equity of the total project cost,” pasabot ni Alcala.
Ang ubang proyekto nga gipangapud-apud sa maong pagbisita sa kalihim naglakip sa pagpanghatag sa kapin sa 300 coconut salt fertilizers, 300 coconut seedlings, 48 kanding, 10 kabaw, 10 baka, 10 paresan sa kanding ug lima ka paresan sa baboy.
Gigusi usab ni Alcala ang Manga Fish Port sa syudad sa Tagbilaran alang sa posibleng rehabilitasyon ug upgrading niini.
Nakita sa kalihim ang maong fish port isip potensyal nga fishing hub ug merkado alang sa mga lokal nga mangingisda ug turista. Gisugyot gani ni Alcala ang paggalam gamit sa fish cages ang mga taas nga kalidad sa isda sama sa pompano ug lapu-lapu duol sa palibot sa maong fish port ug ibaligya sa mga turistang mobisita sa Bohol. (PIA7-Bohol/ECB)
by aimee | Mar 24, 2014 | Local News / Bohol Balita, National News
MANILA, Mar. 24, 2014 (PIA)–Gi-aghat ni Presidente Benigno “Noynoy” Aquino III ang mga lokal nga kagamhanan aron makigtinabangay sa pagpakatap sa impormasyon sa gipalapdang PhilHealth coverage.
Matud pa sa Presidente, dakung papel ang mahimo sa LGUs tungod kay mas kabalo sila sa panginahanglan sa mga residenteng nasakupan niini.
Dugang pa sa Pangulo, dili mahimong malampuson ang usa ka programa kun dili mapahimoslan ang tanan sa target nga benepisyaryo.
Gipangunahan ni Presidente Aquino ang paglusad sa Alaga Ka Para sa Maayos na Buhay Program sa Quezon Memorial Circle sa kaulohan. (PIA7-Bohol/ECB)
by aimee | Mar 17, 2014 | Local News / Bohol Balita, National News
MANILA, Mar. 17, 2014 (PIA)–Gipahibalo ni Department of Transportation and Communications (DOTC) Secretary Jun Abaya nga ipagawas na ang mga plaka nga adunay bag-ong disenyo sa tunga-tunga sa Abril.
Gipasabot sa kalihim nga niadtong Pebrero 16 o 17 pa giduso ni Land Transportation Office (LTO) Chief Alfonso Tan ang unang batch sa order.
Giingong adunay 45 ka adlaw nga committed delivery period, gawas pa sa panahon nga mapakanaog ang maong mga plaka ngadto sa mga distrito gikan sa central office.
Gipasabot usab ni Abaya ang nahimong problema sa mga plaka.
Matud pa nga niadtong 2011, gi-alisdan ang dugay nang supplier sa mga plaka human nagkulang sa delivery.
Tungod niini, ni-desisyon ang DOTC ug LTO nga magbaton og bidding diin managlahing contractor ang nidaog alang sa metal plate, sticker ug pag-emboss.
Nadugay ang proyekto tungod kay nagtinudloay na hangtud sa nag-bid out ang mga contractor ug usa na lamang ang nahimong contractor.
Giingong nagkantidad og P3.8 bilyon ang naa sa 10 ka milyong plaka nga i-deliver sulod sa lima ka tuig.
Dugang pa ni Abaya, sama sa daang plaka, nagkantidad og P450 ang matag plaka sa sakyanan nga adunay bag-ong disenyo samtang P120 ang kantidad sa bag-ong plaka sa motorsiklo. (PIA7-Bohol/ECB)
by aimee | Mar 4, 2014 | Headlines, Local News / Bohol Balita
TAGBILARAN CITY, Bohol, Mar. 4, 2014 (PIA)–Gibuksan na ang Tagbilaran Branch sa Pag-IBIG Fund ning dakbayan.
Matud pa ni Pag-IBIG Senior Specialist Leonardo Cirujales atol sa iyang pagbisita ning buhatan sa PIA-Bohol nga ang extension office sa Pag-IBIG Fund dinhi sa lalawigan nahimo nang usa ka Tagbilaran City Branch.
Kini matud pa pinaagi na usab sa pag-interbenir sa Bohol One Stop Shop (BOSS) nga nakatabang og daku sa ahensya sa pagkab-ot sa gikinahanglang 50,000 ka mga miyembro aron mahimong full branch.
Tungod niini, ang mga miyembro sa Pag-IBIG mahimo nang mo-file sa ilang mga claims ug mo-process sa ilang Multi-Purpose Loans dinhi sa ilang sangang-buhatan nga ipahimutang usab sa Galleria Luisa, ning dakbayan sa Tagbilaran.
Matud pa nga ang probinsiya sa Bohol ang mahimong pilot sa bag-ong loyalty card program sa maong buhatan diin ang pagpa-rehistro ug impormasyon alang sa kaayohan niini makuha sa Kiosk nga ilang ibutang sa Human Resource Management and Development Office (HRMDO) sa Kapitolyo.
Kining labing ulahing kalambuan kabahin usab sa tumong sa Pag-IBIG nga makatubag dayon ug mahimong aktibo nga magdudula sa kaugmaran sa lalawigan sa Bohol. (PIA7-Bohol/ECB)
by aimee | Feb 28, 2014 | Local News / Bohol Balita
TAGBILARAN CITY, Bohol, Feb. 28 (PIA)–Nipasidaan ang City Peace and Order Council (CPOC) batok sa bag-ong modus operandi karon sa pundok sa mga kawatan nga naglibot sa syudad gamit ang Starex van.
Ang maong grupo nigamit sa maong sakyanan nga maoy isalipod atubangan sa tindahan nga ilang lungkabon og didto isakay ang ilang mga kinawat nga gamit ug gamiton kini isip sakyanan sa pag-ikyas.
Nabutyag kini atol sa binuwang tigom kagahapon sa City Peace and Order Council meeting nga gipangulohan ni Tagbilaran City Mayor John Geesnell “Baba” Yap II nga gipahigayon sa Panda Tea Garden sa Dao, ning dakbayan.
Matud pa ni Mayor Yap, ang Bohol Bankers Association mihangyo na usab alang sa dugang ‘police visibility’ o mga polis nga makita sa distrito sa mga magpapatigayon sa dakbayan ilabi na sa Carlos P. Garcia kun CPG Avenue diin nahimutang ang daghang mga bangko.
Gipasalig hinuon ni Mayor Yap nga ang kagamhanan sa dakbayan sa Tagbilaran, magbutang gayud og dugang mga CCTV cameras sa mga nagkalain-laing dapit sa syudad.
Kini agig dugang sa gigamit sa pag-monitor sa kagamhanang probinsyal gikan sa Quick Response Team nga Telephone and Radio System Integrated Emergency Response (TaRSIER 117).
Gibutyag usab ni Mayor Yap atol sa maong tigom nga ang kapolisan sa dakbayan nakadawat og 30 ka bag-ong service firearms gikan sa nasudnong buhatan sa Philippine National Police (PNP).
Samtang si Tagbilaran City Police Chief Jovito Atanacio mi-presentar sa comparative crime statistics alang sa bulan sa Enero ug Pebrero ning tuig sa maong tigom.
Adunay natalang 96 nga gidaghanon sa krimen sa Pebrero, samtang 83 niadtong Enero. Samtang adunay 30 ka nasulbad nga krimen sa Pebrero ug 32 niadtong Enero.
81 ka index crime ang natala sa Pebrero samtang aduna lamang 66 niadtong Enero. Alang usab sa non-index crimes, may natalang 15 sa Pebrero samtang 17 sa Enero.
Ang kapolisan sa syudad adunay 31% crime solution efficiency alang sa bulan sa Pebrero samtang 39% niadtong Enero.
Kabahin sa crime against property, nisaka ang insidente sa karnapping sa Pebrero nga nakatala og 15, itandi sa 4 lamang alang sa bulan sa Enero. (PIA7-Bohol/ECB)
