by admin | Jul 29, 2016 | Headlines, Major Events, National News
MANILA, July 29 (PIA)–Human sa iyang panagpulong sa National Security sa Malakanyang, gimanduan usab ni Presidente Rodrigo Duterte ang mga lider sa mga lokal nga kagamhanan nga hingusgan ang kampanya batok sa ilegal nga droga.
Human sa panagpulong nila niadtong Miyerkules, gipangunahan usab sa Presidente ang oathtaking ceremonies sa mga opisyal sa League of Cities ug League of Provinces of the Philippines.
Gipasabot sa Presidente sa mga nitambong sa maong okasyon nga kun dili siya molihok batok sa pagkatap sa ilegal nga droga, padayon kining mahimong problema sa mosunod nga mga Presidente sa nasod.
Giingong tungod sa gipasagdang problema sa droga, nawala na ang kahadlok sa mga kriminal nga mohimo og krimen ug manubag sa ilang kasal-anan.
Tungod niini, giingong desidido siyang sumpuon ang ilegal nga droga ug ang korupsyon nga kaanib niini.
Gibalik usab ni Presidente Duterte ang plano niyang himuong mga rehabilitation centers ang mga kampo sa militar ug ang pagpadagan og mga rehab centers sa daghang parte sa nasod aron matabangan nga mag-usab ang mga nagumon sa ilegal nga droga. (ecb/PIA7-Bohol)
by admin | Jul 29, 2016 | Headlines, Local News / Bohol Balita, Major Events
TAGBILARAN CITY, July 29 (PIA)–Mas dali na karon mahibaw-an sa publiko kun duol sa aktibong fault line ang usa ka lokasyon pinaagi sa Philippine Institute of Volcanology and Seismology kun PHIVOLCS- Fault Finder.
Ang Fault Finder usa ka web based application nga mahimong ma-access sa bisan kinsa gamit lang ang ilang mga smart phone ug uban pang mobile devices.
Mahimo kining himuong giya sa pagpatukod og balay o bilding o kun ang gi-planong proyekto nahisubay ba sa usa ka aktibong fault line.
Pinaagi sa pag-tap sa screen, makita dayon sa Fault Finder kung may fault nga duol sa inyong lugar.
Dakung tabang usab kining app aron masayran sa publiko ang mga pagpangandam nga angay himuon aron makalikay sa aksidente kun motay-og ang kusog nga linog.
Gawas sa Fault Finder, gilusad usab ning bag-o lang sa PHIVOLCS ang LAVA o ang Local Active Volcano Archive.
Gamit ang mga datos sa LAVA app, mas mapalapdan pa sa mga researcher ang monitoring sa posibilidad sa pagbuto sa mga bulkan sa nasod.
Aron ma-access ang Fault Finder ug LAVA, bisitahon lamang ang www.faultfinder.philvocs.dost.gov.ph ug www.wovodat.philvocs.dost.gov.ph. (ecb/PIA7-Bohol)
by admin | Jul 29, 2016 | Headlines, Local News / Bohol Balita, Major Events
TAGBILARAN CITY, July 29 (PIA)–Nanginahanglan og mga Filipino nurses ang mga ospital sa Germany, matud pa sa Philippine Overseas Employment Administration (POEA).
Base sa Recruitment Specification Form (RSF) No. 160022 nga gipagawas sa POEA nga pirmado ni Atty. Marieta Labong-dela Cruz, Director II sa Government Placement Branch, mahimong government-to-government ang arrangement sa employment sa mga nurse.
Kuwalipikadong mo-applay sa posisyon ang mga lalaki ug babaye nga permanenteng residente sa Pilipinas ug nakahuman og Bachelor of Science in Nursing, adunay Active Philippine Nursing License ug may duha ka tuig nga hospital experience.
Dakung bentaha sa aplikante kun kabalo sa German language apan mahimo usab mopaubos sa German language training sa Pilipinas aron makab-ot ang Level B1.
Abagahon sa employer niining German Federal Employment Agency ang galastohon alang sa maong training.
Ang mga madawat nga aplikante makadawat sa unang sweldo matag buwan nga €1,900 (gross) samtang mokabat sa €2,300 (gross) ang binuwang sweldo human marekognisa isip qualified nurse.
Ang visa ug pletehan sa nurse gikan Pilipinas paingon sa Germany tubagon usab sa iyang employer, pwera sa board and lodging nga abagahon sa empleyado.
Ang mga interesadong aplikante mahimong magparehistro online sa www.poea.gov.ph o sa www.eregister.poea.gov.ph ug personal nga isumiter ang ilang mga dokumento ubos sa heading nga ‘Triple Win’ sa Manpower Registry Division, Windows S ug T sa Ground Floor, Blas F. Ople Building (kanhi POEA Building) sa Ortigas Avenue eskina sa EDSA sa syudad sa Mandaluyong. (ecb/PIA7-Bohol)
by admin | Jul 21, 2016 | Headlines, Major Events, National News
MANILA, July 21 (PIA)–Usa ka Task Force ang gimugna sa Department of Inte¬rior and Local Government (DILG) aron mopahigayon og lalom nga imbestigasyon sa mga opisyales sa gobyerno nga nalambigit sa ilegal nga droga.
Ang inter-agency task force nga gitawag og DILG Inter-Government Operations¬ Network Group (DIGONG) gimugna human sa paghingan sa mga high ranking¬ government officials nga giingong nalambigit sa ilegal nga kalihokan sa droga.
Pangunahan kini sa Kalihim sa DILG ug kasamtangang chairman sa National Police Commission (NAPOLCOM) nga si Ismael Sueno, samtang si DILG Under¬secretary for Operations, Atty. John Castriciones ang Deputy Chair.
Ang mga miyembro sa “Task Force Digong” mao ang mga re¬pre¬sentanteng maggikan sa Phi¬¬lippine National Police (PNP), Bureau of Fire Protection (BFP), Bu¬reau of Jail Management and Peno¬logy (BJMP), Philippine Public Safety College (PPSC), Local Government Academy (LGA), ug Local Government officials.
Matud pa ni Sueno, ang nag-unang responsibildad sa Task Force mao ang asistehan ang NAPOLCOM ug uban pang ahensiya sa gobyerno nga adunay hurisdik¬syon sa pagsusi sa mga opisyal sa gobyerno nga giingong nalambigit sa ilegal nga droga¬. (ecb/PIA7-Bohol)
by admin | Jul 21, 2016 | Headlines, Local News / Bohol Balita, Major Events
TAGBILARAN CITY, July 21 (PIA)–Nagpagawas og memorandum ang Malakanyang nga nagmando sa tanang ahensiya ug departamento sa gobyerno nga ihunong na ang pag-address kang Presidente Rodrigo Duterte og “His Excellency”.
Nahisulod usab sa maong memorandum nga gi-post sa Facebook page sa PTV4 karong adlawa ang kamanduan nga nagbawal sa pagtawag sa mga cabinet secretaries isip “Honorable”.
Sakop sa memo nga gilagdaan ni Executive Secretary Salvador Medialdea ang mga departamento, bureau, pangulo sa mga ahensya, mga GOCCs ug uban pang mga government financial institutions.
Matud pa sa memo, angay tawagon lamang nga President Rodrigo Roa Duterte ang pangulo sa tanang official communications ug dili kini angay i-address og “His Excellency”.
Samtang ang tanang miyembro sa gabinete angay tawagon og “Secretary” sa tanang official communications imbes nga “Honorable”.
Apan kini nagdepende kun may diskresyon ang mga ahensya ug buhatan sa gobyerno nga gamiton ang “Honorable” sa pag-address sa mga department heads ug opisina sa mga internal communications ug documents. (ecb/PIA7-Bohol)
by admin | Jul 20, 2016 | Headlines, Major Events, National News
MANILA, July 20 (PIA)–Gi-klaro ni Presidente Rodrigo Duterte kun nganong dili kaayo hugot ang kampanya sa iyang administrasyon sa ilegal nga sugal.
Sa pagkakaron, nakatutok ang atensiyon sa Presidente sa pagresolba sa nagka-grabeng problema sa ilegal nga droga tungod kay giingong kun gipasugdan pa niya ang pagsumpo sa ilegal nga pasugalan o pagsumpo sa jueteng, dako ang posibilidad nga mag-take over ang organisasyon sa ilegal nga droga.
“Gambling has to stop, but in the meantime that I am focused on the drug menace. Why? Because kapag ka tinanggal mo ‘yan, there is that apparatus of gambling. Iyong mga kumukolekta ng pusta and you suddenly mabakante ‘yan, everybody stops. Ang magte-take over ng organization ‘yan, pakilaman na ‘yan ng droga,” matud pa ni Duterte.
Dugang pa niini, kun padayon nang masumpo ang ilegal nga droga, siguradong mohinay na usab ang ilegal nga sugal tungod kay konektado man ang duha.
Gitataw usab sa Presidente nga gusto niyang ipaubos una sa legal lectures kalabot sa balaod sa saktong pag-aresto kalabot sa ilegal nga pasugalan ang kapolisan.
Nanawagan usab si Duterte sa militar nga tabangan ang kapolisan sa bag-ong kampanya niini batok sa ilegal nga sugal. (ecb/PIA7-Bohol)
