by admin | May 27, 2015 | National News
MANILA, May 27 (PIA)–Nangdawat na og aplikasyon ang Civil Service Commission (CSC) alang sa ipahigayong 2nd Career Service Professional ug SubProfessional written examinations nga gitakda sa Oktubre 18.
Ang application period modagan gikan Mayo 25 hangtud sa Setyembre 3.
Niadtong Mayo 3, kapin sa 180,000 ang nikuha sa pasulit sa Career Service Examination Paper-and-Pencil Test.
Ang pagpasar sa CSE ang usa sa basic requirements sa pag-apply og posisyon sa gobyerno.
Ang eksaminasyon bukas sa indibidwal, bisan unsa ang educational attainment, Filipino citizens apil na ang nagkupot og dual citizenship, di mo-ubos sa 18 anyos sa oras sa pag-file sa aplikasyon ug wala pa nakakuha og susamang level sa eksaminasyon sulod sa tulo ka buwan sa dili pa ang petsa sa eksaminasyon.
Ang application form angay i-submiter og personal sa CSC Regional Office (CSCRO), o sa bisan-asang CSCRO’s Field Offices, diin ang aplikante nag-planong mokuha sa maong eksaminasyon.
Ang CSC mipasidaan nga ang pagpangdawat og aplikasyon matapos bisan unsang oras bisan dili pa moabot ang gitakdang deadline sa Setyembre 3, 2015 kun ang CSC Regional/Field Office makakab-ot na sa target number of applicants. P500 ang examination fee alang sa duha ka levels sa CSE-PPT.
Gitambagan ang mga aplikante sa pag-access sa CSC website nga www.csc.gov.ph ug pangitaa ang 2015 CSE-PPT Examination Announcement, alang sa detalye sa mga testing centers, qualifications, application requirements ug procedures, ug uban pang mahinungdanong impormasyon. (ecb/PIA7-Bohol)
by admin | May 26, 2015 | Headlines, National News
MANILA, May 25 (PIA)–Gitataw sa Malakanyang nga walay kamatuoran ang giingong ‘miyong dropout’ sa mga tunghaan sa higayong ipatuman ang K-12 program.
Matud pa ni Presidential Communications Operations Office (PCOO) Kalihim Herminio Coloma Jr., angay tun-an og maayo sa grupong Anakbayan ang gipahayag niining panglantaw kalabot sa programa.
Kini human gipatik sa website sa Anakbayan youth group ang giingon ni national chairperson Vencer Crisostomo nga mokabat hangtud sa usa ka milyong tinun-an ang mag-dropout ilabi na nga 3,839 lamang sa 7,976 sa mga public high school sa nasud ang naka-sumite og proposal sa pagpatuman sa programa.
Giingong kini nagpasabot nga posibleng dili ma-accommodate sa mga pampublikong tunghaan ang katunga sa kasamtangang duha ka milyong tinun-an sa 4th year high school nga maobligar nga mosulod sa senior high school.
Duda usab ang grupo nga daling makakuha og trabaho ang mga makalampos ubos sa K-12.
Si Coloma nagkanayon nga “hindi po natin nakikita ‘yung senaryo na kanilang ipinipinta hinggil dito, kaya ang atin pong posisyon diyan ay doon pa rin sa aspeto na masiglang pagpapatupad nito.”
“Wala po tayong hangarin dito na mapariwara, bagkus gusto natin pong mapabuti ang kinabukasan ng ating mga kabataan.”
Gitumbok pa ni Coloma nga madugangan ang kahibalo sa kabataan sa kalibotanong larangan tungod sa K-12.
Gi dugang usab sa Kalihim nga ‘on track’ ang gobyerno sa preparasyon niini alang sa full implementation sa maong programa nga nagdugang og duha ka tuig sa secondary education. (ecb/PIA7-Bohol)
by admin | May 26, 2015 | National News
MANILA, May 25 (PIA)–Ang Department of Social Welfare and Development (DSWD) milagda og memorandum of agreement uban sa Department of Energy (DOE) alang sa partnership sa implementasyon sa proyektong National Intensification of Household Electrification (NIHE).
Ang NIHE usa ka proyektong nagtinguha sa paghatag og serbisyong elektrisidad ngadto sa mga kabos nga pamilyang walay akses sa sugang dagitab.
Kining inisyatiba sa DOE agi og pagsunod sa implementasyon sa ilang 2014-2017 Household Electrification Development Plan (HEDP), nga nagtinguhang makab-ot ang 90% household electrification sa tuig 2017.
Isip partner agency, ang DSWD mohatag og listahan sa potensiyal household beneficiary alang sa proyekto sa NIHE gamit ang Listahan o ang National Household Targeting System for Poverty Reduction (NHTS-PR).
Ang Listahanan usa ka information management system nga magtino kinsa ug asa nahimotang ang mga kabos.
Kini gamiton sa paghimo og komprehensibong database sa mga kabos nga pamilya alang sa nasudnong ahensiya sa gobyerno ug ubang social protection stakeholders isip basehan sa pagtumbok sa mga programa ug serbisyo sa social protection.
Base sa 2011 nga datos sa Listahan, di mo-ubos sa 2.6 milyong kabos nga pamilya sa tibuok nasud ang walay akses sa sugang dagitab. (ecb/PIA7-Bohol)
by admin | May 26, 2015 | National News
MANILA, May 25 (PIA)–Nisalmot sa Brigada Eskwela 2015 sa Department of Education (DepEd) si Presidente Benigno ‘Noynoy’ Aquino III.
Mibisita ang Presidente sa Marikina Elementary School sa Barangay Sta. Elena Lunes sa buntag kauban nila DepEd Sec. Bro. Armin Luistro ug Marikina Mayor Del De Guzman.
Matud pa sa Presidential Communications Operations Office (PCOO), gi-inspeksyon niini ang mga lawak tungaan sa wala pa nihatag og briefing si Luistro.
Ang Brigada Eskwela tinuig nga kalihokan sa DepEd diin ang mga school officials, magtutudlo, estudyante ug mga miyembro sa komunidad magtinabangay sa pagpanghinlo, pag-ayo ug pagpangandam sa mga pampublikong tunghaan usa ka semana sa dili pa magbukas ang klase.
Gi-aghat sa DepEd ang publiko nga makighiusa sa programa aron masiguro nga andam ang mga pasilidad sa mga pampublikong tunghaan sa pagbukas sa klase.
Base sa pahibalo sa buhatan, sa Hunyo 1 pormal nga magsugod ang mga klase nga matapos usab sa Abril 1, 2016. (ecb/PIA7-Bohol)
by admin | May 16, 2015 | National News
MANILA, May 15 (PIA)–Mahimo nang magparehistro pinaagi sa internet ang mga botanteng Pinoy nga nagpuyo sa gawas sa nasud.
Kini human ilusad sa Department of Foreign Affairs (DFA) Overseas Voting Secretariat (OVS) ug Commission on Elections (Comelec) ang iREHISTRO.
Apil niini ang mga rehiyon sa Estados Unidos, Europe, Middle East ug Africa.
Sa mga nakapuyo sa rehiyon sa Estados Unidos, mahimong moadto sa Embahada sa Pilipinas sa Washington, Brasilia, Buenos Aires, Mexico, Ottawa ug Santiago apil na usab sa mga konsulada sa nasud sa Agana, Chicago, Honolulu, Los Angeles, New York, San Francisco, Toronto ug Vancouver.
Ubos sa iREHISTRO, kinahanglan pang personal nga moadto ang aplikante sa mga Foreign Service Posts o Mobile/Field registration site aron mag-fill out og form apil na usab ang pagpa-biometrics.
Apan mahimo nang maka-access ang aplikante sa maong mga form sa ilang pinuy-anan o buhatan ug didto i-fill out.
Makapa-set na usab og appointment ang aplikante aron maproseso ang iyang pagparehistro.
Mahimo usab mo-log on sa www.irehistro.com o www.comelec.gov.ph.
Matapos ang registration period sa Oktubre 31, 2015. (ecb/PIA7-Bohol)
by admin | May 16, 2015 | Headlines, National News
MANILA, May 15 (PIA)–Napili si Manila Archbishop Luis Antonio Cardinal Tagle isip bag-ong presidente sa Caritas Internationalis, usa ka kompederasyon sa global Catholic charities.
Kapin sa 300 ka mga delegado sa Caritas sa tibuok kalibotan ang mibotar alang ni Cardinal Tagle sa ikaduhang adlaw sa ilang pulong sa Roma kagahapon.
Si Tagle ang labing unang Asian nga natudlong presidente sa maong international organization isip hulip ni Cardinal Oscar Rodriguez Maradiaga sa Tegucigalpa nga nialagad na sa iyang ikaduha ug kataposang termino.
Mayo 17, opisyal nga mo-alagad si Cardinal Tagle isip presidente sa Caritas Internationalis diin miyembro ang 165 ka grupo.
Nag-alagad usab ang Pilipinong kardinal isip presidente sa Catholic Biblical Federation (CBF) samtang miyembro usab siya sa Roman Curia ug Permanent Council of the Synod of Bishops. (ecb/PIA7-Bohol)
