by admin | Apr 10, 2015 | Headlines, National News
MANILA, April 10 (PIA)–Padayon nga atimanon sa gobyerno ang mga war veterans ug palapdan pa ang ilang katungod.
Kini ang unod sa mensahe ni Presidente Benigno ‘Noynoy’ Aquino III sa pagtimaan sa ika-73 nga Araw ng Kagitingan diin miingon kini nga angay lamang nga masuklian sa gobyerno ang gipakitang kaisog sa mga beterano aron mapanalipdan ang kagawasan ug ipatunhay ang mas maayong kaugmaon sa mga Pilipino.
“Sa mabuting pamamahala, higit pa nating pinapabuti at pinapalawak ang natatanggap n’yong mga benepisyo. Pangunahin po nating tinututukan ang paglilinis at pagsasaayos ng listahan ng mga beteranong nakakatanggap ng ayuda, sa ilalim ng Pensioner’s Revalidation Program. Siyempre po, makatarungan lang na ang tanging makakakuha ng benepisyo ay ang mga lehitimong beterano, at walang nakikihating hindi kuwalipikado,” matud pa ni PNoy.
Giyagyag niini ang mga maayong balita sa mga beterano sama sa pagpalapad sa pagpatuman sa Philippine Veterans Affairs Office sa Validation Program pinaagi sa mga pormal nga kasabotan sa mga kaabag nga bangko, financial institutions, local civil registrars ug uban pang ahensiya sa gobyerno.
Giingong digital na ang records sa mga beterano ug dili na mano-mano ang pagpalista.
Sa pagpanguna sa Veterans Memorial Medical Center ug sa 601 ka pampublikong ospital sa tibuok nasud, giseguro ni PNoy nga natutokan gayud ang panglawas sa mga beterano. Apil na niini ang paghatag og daily medical subsidy kun ma-confine sa ospital. May tabang-pinansiyal usab alang sa operasyong medikal sama sa cataract, coronary angiogram, angioplasty, cardiac bypass ug chemotherapeutic agents.
Gikan Hulyo 2010, giingong 8,760 ka beterano ug ilang mga dependent ang nakapahimos sa mga nahisgotang serbisyo nga nagkantidad og P81.6 milyon.
Nakahatag na usab ang gobyerno og subsidy alang sa medical products sama sa orthopedic implants ug prosthesis, hearing aid ug dentures.
Gikan Hulyo 2010, nikabat na sa 15,571 dependents sa mga beterano ang gisuportahan sa gobyerno sa ilang pagtuon ubos sa Educational Benefits Program sa PVAO nga adunay financial assistance nga mikabat taman P36,000 matag tuig alang sa kwalipikadong tinun-an. (ecb/PIA7-Bohol)
by admin | Apr 8, 2015 | Headlines, National News
MANILA, April 08 (PIA)–Pangunahan ni Presidente Benigno ‘Noynoy’ Aquino III ang pagsaulog sa ika-73 nga Araw ng Kagitingan sa Huwebes, Abril 9.
Ipahigayon ang komemorasyon sa Filipino war veterans sa Mount Samat National Shrine sa Pilar, Bataan sa may alas-9:00 sa buntag.
Mohalad si PNoy og wreath sa shrine nga sundan sa paghatag og mensahe gikan ni Japanese Ambassador Kazuhide Ishikawa, US Ambassador Philip Goldberg ug ang keynote address sa Pangulo.
Ang tema sa aktibidad karong tuig mao ang: “Ipunla ang Kagitingan sa Kabataan, Ihanda ang Beterano ng Kinabukasan.”
Gipaabot nga motambong ang kapin sa 5,000 ka war veterans kauban ang ilang pamilya, lokal ug langyaw nga mga bisita alang sa maong tinuig nga kasaulogan.
Sundan kini sa “Paggunita sa Capas,” wreath laying ceremony sa Capas National Shrine sa Tarlac sa alas-9:00 sa Biyernes sa buntag.
Parte kini sa usa ka semanang selebrasyon sa Veterans Week nga ipahigayon matag Abril 5 hangtud 11 alang sa mga war veterans nga nagsakripisyo alang sa kalinaw sa nasud.
Kahinumdoman nga niadtong Abril 9, 1942, gibanabanang 75,000 ka Pilipino ug American prisoners of war ang napugos pag-martsa og 100 kilometeros gikan sa -Mariveles, Bataan hangtud San Fernando Pampanga human ang tulo ka buwang pakigbugno sa Japanese forces.
Gidala ang mga prisoners of war sa Camp O’Donnell sa Capas, Tarlac diin didto sila nabilanggo hangtud 1945.
Ang Dambana ng Kagitingan gipabarug ibabaw sa Mount Samat niadtong 1966 ubos ni kanhing Presidente Ferdinand Marcos nga usa usab ka war veteran isip pag-ila ug paghinumdom sa mga bayaning sundalo.
Usa ka National holiday ang Araw ng Kagitingan. (ecb/PIA7-Bohol)
by admin | Apr 8, 2015 | Headlines, National News
MANILA, April 08 (PIA)–Ang Department of Education (DepEd) nipahibalo nga ang school year 2015-2016 sa mga pampublikong tunghaan sa elementary ug high school magsugod sa Hunyo 1, 2015 ug matapos sa Abril 1, 2016.
Base sa Department Order No. 9 nga gipagawas na DepEd diin gibutang ang mga detalye sa bag-ong academic calendar, adunay 201 school days ning tuig, apil na ang lima ka adlaw nga In-Service Training (INSET) break.
Matud pa ni DepEd Kalihim Armin Luistro, samtang adunay mga pribadong tunghaan nga mosimang sa school calendar, kinahanglang magsugod ang ilang klase gikan Hunyo 1 hangtud Agosto 31.
Giingong kinahanglang ipahibalo daan sa mga pribadong tunghaan sa mga hingtungdang opisyal sa DepEd ang petsa sa pagbukas sa ilang mga klase kun dili sila mosugod pagbukas sa ilang klase sama sa mga pampublikong tunghaan sa Hunyo 1.
Matud pa usab ni Luistro nga ang mga tunghaan mahimong mopahigayon og mga nasudnon ug lokal nga selebrasyon, holidays ug mga advocacy activities gawas sa nakabutang sa school calendar, basta kinahanglang masunod lang gihapon ang total number of school days.
“Make-up classes can therefore be conducted to compensate for the school days spent for activities deemed beneficial to the learning-teaching process. Likewise, make-up classes are recommended in lieu of no-school days due to occurrence of a natural and man-made calamities,” matud pa ni Luistro.
Dugang pa sa Kalihim, ang mekanismo sa pagpahigayon og make-up class kinahanglang uyonan sa mga school administrators ug mga ginikanan sa mga estudyante. (ecb/PIA7-Bohol)
by admin | Apr 8, 2015 | Headlines, National News
MANILA, April 08 (PIA)–Aduna nay temporary hotline ang Department of Foreign Affairs (DFA) Action Center alang sa mga kabanay sa mga Overseas Filipino Workers (OFWs).
Matud pa sa DFA, mahimong tawagan ang ilang action center sa temporary hotlines nga (02) 832-32-15 ug (02) 832-32-64.
Samtang gipahinumdoman usab sa DFA ang publiko nga sarado ang ilang consular services apil na ang passport, visa ug authentication services ugma, Abril 9, Araw ng Kagitingan.
Mobalik ang ilang normal nga operasyon sa Biyernes, Abril 10. (ecb/PIA7-Bohol)
by admin | Apr 1, 2015 | Headlines, National News
MANILA, April 01 (PIA)–Nipasidaan ang Department of Health (DoH) sa publiko nga ampingan ang ilang panglawas tungod sa pagsulpot sa mga sakit sa panahon sa ting-init ilabi na sa paghidangat sa Semana Santa.
Kini ang gipahinumdom ni DoH Kalihim Janette Garin kalabot sa pagsugod sa Semana Santa diin sugod usab sa bakasyon ug mga kalihokan sa katawhan apil na ang outing, pista ug uban pa.
Matud pa ni Garin, adunay unom ka sakit (6S) ang mosulpot sa paghidangat sa ting-init apil na ang sore eyes, sun burn, sip-on ug ubo, suka ug pagkalibanga, sakit sa panit ug sakmal o hasmag sa iro.
Pasidaan pa ni Garin, ang sore eyes mahimong makabuta kun dili kini madali mao nga gitambagan niini ang publiko nga batasanong manghunaw gayud sa mga kamot aron dili mapakatap ang bacteria o viruses sa ubang tawo. Giingong dili usab angay mogamit og mga eye drops nga walay tambag sa doktor.
Giingong malikayan usab ang sun burn kun likayang mogawas gikan alas 10:00 sa buntag hangtud alas 2:00 sa pales ug kun dili malikayan, gamit og sunscreen protection.
Batasanon usab ang pag-inom og 8-12 ka basong tubig sa usa ka adlaw aron makalikay sa heat stroke.
Giingong dali lang matakdan sa sip-on ug ubo tungod sa pausab-usab nga panahon mao nga gitambagan ang mga tigulang o senior citizens nga magpabakuna batok sa influenza sa dili pa man magsugod ang ting-init.
Likayan usab ang mga pagkaon nga street foods o mga pagkaon nga gibaligya sa kadalanan ug mga pagkaong dali lang mapan-os tungod sa init nga kasagarang hinungdan sa pagsuka ug pagkalibanga. (ecb/PIA7-Bohol)
by admin | Apr 1, 2015 | Headlines, National News
MANILA, April 01 (PIA)–Gi-alerto na sa Malakanyang ang mga hingtungdang ahensya sa gobyerno ilabi na ang Philippine Atmospheric, Geophysical and Astronomical Services Administration (PAGASA) ug National Disaster Risk Reduction & Management Council (NDRRMC) kalabot sa gipaabot nga pagsulod sa bagyong ‘Chedeng’ sa nasud karong Semana Santa.
Giingong kusog ug naa sa Category 4 ang maong bagyo nga may gikusgong hangin nga 260 kilometers per hour nga adunay direksiyong paingon sa amihanang kasadpan.
Gibanabanang mosulod sa Philippine Area of Responsibility (PAR) ang maong bagyo karong gabii o ugma sa kadlawon.
Gipaabot nga sa Biyernes o Sabado mabati ang epekto sa bagyo.
Matud pa ni Presidential Spokesperson Edwin Lacierda, maghatag og regular updates ang PAGASA alang sa gikinahanglang pagpangandam sa mga local government units (LGUs) ug prepositioning sa mga relief goods.
Sigun pa ni Lacierda, gipaabot nga dili “time on target” ang paghatag og abiso apan sayuhon ang mga pasidaan aron malikayan ang trahedya.
Gitambagan ang publiko ug mga biyahero nga i-monitor ang bagyo ug maminaw sa balita kalabot niini.
Kun gikinahanglan, giingong andam pangunahan ni Presidente Benigno ‘Noynoy’ Aquino III ang NDRRMC meeting aron mas epektibo ang pagpangandam sa mga ma-igong residente sa Visayas, Mindanao ug Central Luzon. (ecb/PIA7-Bohol)
